МАН-ын 7-р бага хурал Тусгаар тогтнолын ордонд эхэлсэн билээ. Хурлыг нээж МАН-ын дарга, Монгол Улсын Ерөнхий сайд У.Хүрэлсүх үг хэллээ.

Тэрбээр : "Төрийн эрх барих дээд байгууллага буюу УИХ-ын найм дахь удаагийн сонгууль амжилттай болж өндөрлөлөө. Улс төрийн ууган хүчин МАН-д итгэж, бидний мөрийн хөтөлбөрийг дэмжиж УИХ-д нэр дэвшүүлсэн 76 хүнээс 62-ыг нь сонгож итгэл хүлээлгэсэн Монголынхоо ард түмэн, намын гишүүд, дэмжигчдэд талархал илэрхийлье. Ард түмэндээ баярлалаа. Одоо бидэнд ард түмнийхээ итгэл найдварыг хариулах үлдэж байна. Маш хариуцлагатай ажиллаж, эхлүүлсэн ажлаа дуусгах ёстой. Ард иргэдийнхээ ажил амьдрал, хөгжил дэвшлийн төлөө улс төрийн ууган нам бүхий л хүчээ дайчлан ажиллана гэдгийг онцолж хэлмээр байна. Монголынхоо ард түмэнд дахин талархаж буйгаа илэрхийлье" гэв.

МАН-ын Бага хурлын гишүүд Ерөнхий сайдад МАН-ын дарга У.Хүрэлсүхийг 100 хувийн саналаар нэр дэвшүүллээ. Бага хурал нь 369 гишүүнтэй. Үүнээс 189 нь хуралдаа биечлэн оролцож, 97 нь хөдөө орон нутгаас цахмаар оролцож 87.5 хувийн ирцтэйгээр хуралдсан юм. Бага хурлыг МАН-ын ерөнхий нарийн бичгийн дарга Д.Амарбаясгалан, УИХ-ын гишүүн М.Оюунчимэг нар удирдан явууллаа.

МАН-ын ерөнхий нарийн бичгийн дарга Д.Амарбаясгалан  “Монголын ард түмэн 2020 оны парламентын сонгуулиар МАН-ын дарга, Монгол Улсын Ерөнхий сайд У.Хүрэлсүхийг багаар нь сонгосон. Энэ хүндтэй сонголтыг МАН-ын Бага хурал баталгаажуулж, Ерөнхийлөгчид өргөн мэдүүлэх тогтоолыг хэлэлцэн баталлаа. 

МАН-ын хувьд ялалт гэхээсээ илүү маш өндөр хариуцлага ирлээ гэж үзэж байгаа. Ирэх дөрвөн жилийн хугацаанд Монгол Улсад эдийн засгийн нөхцөл байдал хамгийн хүнд байгаа. Дөрвөн жилийн хугацаан 2.9 тэрбум ам.долларын өр тэглэх том үүрэг хариуцлага бий” гэлээ. 
Засгийн газрын бүтэц, бүрэлдэхүүнийг хэрхэн бүрдүүлэх талаар түүнээс тодруулахад “Үндсэн хуульд оруулсан нэмэлт, өөрчлөлтийн дагуу УИХ-ын дөрөв хүртэл гишүүн Засгийн газрын гишүүн болох боломжтой байгаа. Энэ хүрээнд Засгийн газраа байгуулж ажиллана. 
МАН өнгөрсөн жилийн хугацаанд Засгийн эрх барьж байсан учраас дараагийн дөрвөн жилд илүү тогтвортой байдлын хангах ажиллах болно. 

МАН-д эхлүүлсэн шинэчлэлээ үргэлжлүүлэх шаардлага бий. Улс төрийн нам ард түмнийхээ дунд өндөр нэр хүнтэй, өндөр зарчимтай, шударга ажилладаг болохын төлөө бид эхлүүлсэн ажлаа дуусгана. Тийм учраас би намын ерөнхий нарийн бичгийн даргаараа үргэлжлүүлж ажиллана. 

Одоохондоо сайд нарын асуудлыг хэлэлцэж эхлээгүй байна. Ерөнхий сайдын нэрийг Ерөнхийлөгчид өргөн мэдүүлнэ. Ерөнхийлөгчтэй зөвшилцсөний үндсэн дээр УИХ-аар оруулж, батална. 

Түүний дараа Ерөнхий сайд Засгийн газартаа тодорхой хэмжээний бүтцийн өөрлөлт хийнэ. Тэр нь Үндсэн хуультай холбоотой асуудал байгаа. Үндсэн хуулиар эдийн засгийн асуудлыг чухалчилж үзэх нөхцөл бий болсон. Хоёрдугаарт, МАН мөрийн хөтөлбөртөө Соёлын яам байгуулна гэж онцгойлон тусгасан. Хөгжлийн төлөвлөлт, эдийн засгийн тусдаа яам байх уу эсвэл зарим сайдын эрхлэх асуудлын хүрээнд авч явах уу гэдгээ одоо ярьж байна. 

Нэг талдаа эдийн засгийн хөгжлийн яам гэж тусдаа яам байх ёстой гэж эдийн засагчид үздэг. Нөгөө талдаа Сангийн яамнаас салсан тохиолдолд яах вэ гэдэг олон зүйлээс хамаарч тусдаа яам байх нь зөв үү буруу юу гэдгийг бид хэлэлцэж байна. Шинээр Засгийн газар байгуулагдаж байгаа учраас төсөвт тодорхой зохицуулалт хийгдэнэ” гэдэг мэдээлэл өглөө. 

Түүнчлэн ЖДҮХС-гаас зээл авсан гэх асуудалд холбогдсон гишүүдийг сайдаар томилох эсэх асуудалд “Намын удирдлагын зүгээс ждү-д холбогдсон гишүүдэд нэр дэвших эрх олгоогүй. Хоёрдугаарт, энэ асуудалд холбогдсон гишүүд өөрсдөө ч нэр дэвшихээс татгалзсан. Нөгөө талдаа тухайн хүмүүсийн буруу гэдгийг хуулийн байгууллагаас тогтоогдоогүй. 

Ёс зүйн хариуцлагаа хүлээн хойшоо суусан хүмүүсийг бид насан туршид нь шийтгэнэ гэж байхгүй. Тодорхой хэмжээний улс төрийн хариуцлага хүлээлгэж байгаа. Магадгүй тодорхой түвшинд намын томилолт авч ажиллахыг үгүйсгэхгүй. Өнөөдрийн байдлаар тэр, энийг  сайд болгоно гэж албан ёсоор яригдаагүй учраас хэлэхэд эрт байна” гэсэн хариулт өглөө. 

Мэдээллийн төгсгөлд тэрбээр "МАН-ын нэр дэвшсэн Ж.Эрдэнэбатын хувьд асуудал нь шүүхийн шатанд байгаа. Энэ асуудалд онцгойлон анхаарч ажиллана" гэлээ.