Тусгаар тогтнолын ордонд МАН-ын Удирдах зөвлөлийн хурал болж, Ерөнхий сайдад ЗГХЭГ-ын дарга Л.Оюун-Эрдэнийг 100 хувийн саналаар дэмжжээ.
Ерөнхий сайдад Л.Оюун-Эрдэнэтэй өрсөлдөх нэр дэвшигч байгаагүй бөгөөд У.Хүрэлсүхийн Засгийн газрын бодлогыг хэвээр нь үргэлжлүүлэх учир түүнд итгэл үзүүлсэн байна.

Ерөнхий сайдад нэр дэвшигчийн асуудлыг МАН-ын Бага хурлаар хэлэлцэж, шийдвэрээ гаргаж, асуудлыг УИХ-д өргөн мэдүүлснээр Монгол Улсын 32 дахь Ерөнхий сайд томилогдоно. Үндсэн хуульд заасны дагуу шинэ Ерөнхий сайд танхимаа өөрөө байгуулна.

Засгийн газрын гишүүд ажлаа хүлээн аваад дөнгөж зургаан сар болж байгаа бөгөөд одоогийн бүрэлдэхүүнд бага өөрчлөлт оруулна гэсэн мэдээлэл байна.