Би одоогоос дөрвөн жилийн өмнө МАН-ын 27-р Их хуралдаанаар намын гишүүдийнхээ итгэл дэмжлэгтэйгээр намын Ерөнхий нарийн бичгийн даргын албыг хүлээн авсан. Энэ хугацаанд МАН-ын ялалтын төлөө та бүхэнтэйгээ мөр зэрэгцэн зүтгэж, хүнд хэцүү үеийг хамтдаа туулсан. Энд цугласан та бүхэн бүгдийг мэдэж байгаа. Би тухайн үед нэг л зарчим хэлж байсан. Зугтсан нь биш, зүтгэсэн нь хойморт сууна гэж. Харамсалтай нь 2016 оны сонгуулийн дараа энэ зарчим бүрэн хэрэгжиж чадаагүй. Тиймээс цаашид энэ зарчим хэрэгжээсэй гэж хүсч байна. Намыг удирдаж байгаа хүмүүс энэ зарчмыг мөрдлөгө болгон ажиллаасай. УИХ-ын чуулганы танхимд Ерөнхий сайд У.Хүрэлсүхтэй хэрүүл хийж, намынхаа нэр хүндэд сөргөөр нөлөөлсөнд намын мянга мянган гишүүдээсээ уучлал хүсч байна. Намын бүлгийн хуралдаан дээр энэ үйлдлийнхээ төлөө ямар нэгэн хариуцлага хүлээхэд бэлэн гэдгээ бүлгийн гишүүддээ хэлсэн. Гэхдээ сөрөг хүчинтэйгээ нийлж Засгийн газраа унагаж, өнөөдрийн хагархай, бутархай эв түнжингүй байдлыг бий болгосон хүмүүстэй хариуцлага тооцсны дараа ямар ч хариуцлага хүлээхэд би бэлэн. МАН-ыг эрхэм нандин үзэл баримтлалтай, итгэл үнэмшилээр нэгдсэн эрхэм хүмүүсийн нэгдэл гэж боддог. Түүнээс цэргийн тушаалаар хөдөлдөг нам биш. Тиймээс цаашид МАН-ыг тушаал, зандралтаар биш бодлого, ёс суртахуун, дүрэм журам, итгэл сэтгэлээр удирддаг байгаасай гэж хүсч байгаа юм. Сүүлийн үед МАН 2 хуваагдаж байгаа нь үнэн. Үүнийг эвлүүлж чадах тийм л хүнийг намыг дарга болоосой гэж хүсч байна. Цаашид ачааны хүндийг үүрэх болохоор арагш суудаг, албан тушаал авах болохоор урагш ухасхийдэг байдлыг МАН таслан зогсоох ёстой гэж бодож байна. Тиймээс би зугтсан нь биш зүтгэсэн нь гэдэг зарчим дээрээ хатуу зогсч байна.

Б.Саруул