Цасан шуурганаар төөрсөн 159 иргэний амь насыг аварчээ

Өнгөрсөн шөнө Баянхонгор, Говь-Алтай, Дорноговь, Дундговь, Өвөрхангай, Өмнөговь, Төв аймгийн нутгаар салхи 16-24 м/с хүртэл ширүүсэн цасан болон шороон шуурга шуурсан. Цасан шуурганы улмаас  Баянхонгор, Говьсүмбэр, Дундговь, Өвөрхангай, Сүхбаатар, Төв аймаг, нийслэлийн Сонгинохайрхан дүүргийн нутаг дэвсгэрт 161 хүн малдаа яваад сураггүй болсон, тээврийн хэрэгсэлтэй цасанд суусан зэрэг нийт 23 удаагийн дуудлага Онцгой байдлын байгууллагад ирсэн байна.

 Дуудлагын дагуу  Онцгой байдал, цагдаа, орон нугийн байгууллагын 137 хүн, 32 тээврийн хэрэгсэл ажиллан, 159 хүний амь нас, эрүүл мэндийг авран хамгаалав. Одоогоор Төв аймгийн Бүрэн суманд малдаа яваад сураггүй болсон  хоёр иргэнийг эрэн хайх ажиллагаа үргэлжилж байна.

 2018 оны 04 дүгээр сарын 05-ны өдрийн 16:20 цагийн байдлаар Дорноговь, Дорнод, Дундговь, Өмнөговь, Сүхбаатар, Төв, Хэнтий аймгийн нутгаар салхи 16-24 м/с хүртэл ширүүсч цасан шуурга шуурч байна.

Иймд:

-Хүчтэй салхи шуурганы үеэр иргэд, тээврийн хэрэгслийн жолооч нар хол, ойрын замд зорчихгүй байх, бага насны хүүхэд, өндөр настан болон хөгжлийн бэрхшээлтэй иргэдэд анхаарал тавих, холбогдох мэргэжлийн байгууллагуудаас гаргасан анхааруулах, сэрэмжлүүлэх мэдээллийг үндэслэн ажлаа зөв зохицуулах;

-Цас их хэмжээгээр орж, хүчтэй салхи шуурга болох үеэр зам даваа хаагдан, цахилгаан дамжуулах агаарын шугамд саатал гарч болзошгүй тул холбогдох мэргэжлийн байгууллагууд хүч хэрэгслийг тодотгон бэлтгэл, бэлэн байдлаа хангах;

-Хүчтэй салхи шуурганы үеэр автозамын зорчих хэсэгт үүссэн хальтиргаа гулгааны улмаас зам, тээврийн осол гарах, автомашин олноор замд саатах, автомашины шатахуун дуусах, эвдрэх, иргэд холбоогүй болох зэрэг тохиолдол гарч зорчигчдын амь нас, эрүүл мэндэд эрсдэл учирдаг тул зайлшгүй тохиолдолд тээврийн хэрэгслийн хөдөлгөөнийг холбогдох хууль тогтоомжид заасны дагуу хязгаарлалт хийдэг тул Онцгой байдлын ерөнхий газрын 325726, 265726 дугаарын утсанд холбогдож мэдээлэл авахыг зөвлөж байна.

  • Манай сайт таалагдсан бол лайк дараарай

АНХААРУУЛГА: Уншигчдын бичсэн сэтгэгдэлд unen.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү. Хэм хэмжээ зөрчсөн сэтгэгдлийг админ устгах эрхтэй. 

Сэтгэгдэл (0)