Гэр хорооллын дахин төлөвлөлтийн төслийг хэрэгжүүлэх чиглэлээр нийслэлээс баримталж байгаа бодлого, үйл ажиллагаа, цаашид авах арга хэмжээний талаар нийслэлийн Засаг даргын Дэд бүтэц, гэр хорооллын хөгжлийн асуудал хариуцсан орлогч П.Баярхүү танилцуулав. Нийслэлийн гэр хорооллыг гурван бүсэд хувааж хөгжүүлэхээр төлөвлөжээ. Тодруулбал, төвийн бүсийн гэр хорооллыг орон сууцжуулах, дундын бүсийнхийг бие даасан болон хэсэгчилсэн инженерийн шугам сүлжээгээр хангах буюу дэд бүтцийн төвүүдийг барьж байгуулах, захын бүсийн гэр хорооллын өйл өрхүүдэд хамгийн сүүлийн үеийн техник техологийг нэвтрүүлэх аж. “Дэд бүтцийн төв”- ийг барьж байгуулах 50 байршлыг энэ онд баталсан. Цаашид 2020 он хүртэл нийт 100 байршилд уг төслийг хэрэгжүүлэхээр ажиллаж байна. Төслийг хэрэгжүүлснээр 20-30 мянган айлын инженерийн дэд бүтцийн асуудлыг бүрэн шийдэж, 61.3 га газрын хөрсийг бохирдуулагч эх үүсвэр устах юм. Улаанбаатар хотын гүний усны нөөц, эх үүсвэрийг хамгаалах, бохирдох эрсдэлийг бууруулж, 439.200 шоо метр хөрсийг нөхөн сэргээнэ. Төсөлд хамрагдсан айл өрхийн нийгмийн, дэд бүтцийн асуудлыг шийдэж, ногоон байгууламж бий болгосноор иргэдийн амьдрах орчин сайжирна. Дэд бүтцийн төвийг түшиглэн 6800 орчим ажлын байр шинээр бий болох юм байна. Дэд бүтцийн нэг төв байгуулахад байршлаасаа шалтгаалан 5-7 тэрбум төгрөг шаардлагатай гэсэн тооцоо гаргажээ.

Чингэлтэй дүүргийн VII хороонд байгуулах төвд таван тэрбум төгрөг зарцуулахаар төсөл боловсруулсан талаар нийслэлийн Гэр хорооллын дэд бүтцийн хөгжлийн газрын дарга Ч.Батбилэг ярилаа. Тэрбээр “Энэ төв гэр хорооллын айл өрхийг цахилгаан, дулаан, халуун хүйтэн усаар бүрэн хангах юм. Ингэснээр нийслэлийн агаар, хөрс, усны бохирдлыг бууруулахад томоохон түлхэц болно. Нөгөөтэйгүүр, “Дэд бүтцийн төв”-д холбогдсон хашааны газрын ханш 3-4 дахин өснө гэсэн тооцоолол бий” гэлээ.

ДЭД БҮТЦИЙН ТӨВ БАРИХ ТӨСЛИЙГ ИРГЭД ДЭМЖИЖ БАЙНА

“Дэд бүтцийн төв” байгуулах асуудалд тус хорооны оршин суугчид ямар байр суурьтай байгаа талаарх сэтгэгдлийг сонслоо. Д.БААТАР: -Би энэ хороонд 25 жил амьдарч байна. Өнгөрсөн хугацаанд энэ хэсгийг хөгжүүлэх чиглэлээр нийслэл, дүүргээс тодорхой ажил эхлүүлээгүй. Харин энэ удаад үнэхээр том өөрчлөлт, шинэчлэлийн эхлэлийг тавьж байгаад баяртай байна. Энэхүү төслийг амжилттай хэрэгжүүлэхэд иргэд бид нягт хамтран ажиллах болно. Гэхдээ төр засгийн удирдлагууд аливаа ажил, төсөл хөтөлбөрийг эхлүүлчихээд бүрэн длуусгалгүй орхих тохиолдол бий. Тиймээс төслийг хэрэгжүүлэхийн төлөө бүгд нэг сэтгэлтэйгээр хамтран ажиллахыг уриалж байна.

Х.ДОЛГОРМАА: -Дахин төлөвлөлтийн хүрээнд хийх бүтээн байгуулалтын ажлыг бүрэн дэмжих нь агаар, хөрсний бохирдлыг бууруулахад бидний оруулж буй томоохон хувь нэмэр. Дэд бүтцийн ажлын талаар долоо хоног, сар тутамд хороон дээр уулзалт зохион байгуулж, зөвлөгөө мэдээлэл өгдөг.

Б.ГОМБОРАГЧАА: -Хүн суурьшаагүй байх үед манайх энэ хороонд бууж байлаа. Сүүлчийн жилүүдэд оршин суугчдын тоо нэмэгдээд байгаа ч иргэдийн амьжиргаа, орчин нөхцөл огт сайжирсангүй. Харин ч агаар, хөрсний бохирдол нэмэгдэж, эргээд иргэдийн эрүүл мэндэд сөргөөр нөлөөлж байна. Тиймээс энэхүү төслийг хэрэгжүүлэхийг би дэмжиж байгаа.

Б.Саруул