Манай улсаас БНСУ руу зорчих хүсэлтэй иргэн маш олон байдаг. Тус улсын хөдөлмөрийн хөлс манай улсынхаас харьцангуй өндөр учраас очиж, ажил хийх хүсэлтэй хүн цөөнгүй байдаг. Тэгвэл ГХЯ-наас БНСУ руу визгүй зорчдог болохоор ярилцаж эхлээд буй. Энэ хүрээнд тус яамны зүгээс ямар ажил хийж байгаа талаар ГХЯ-ны Консулын газрын захирал Я.Ариунболд мэдээлэл өгчээ. Тэрбээр уг асуудлаар болон БНСУ-д зорчих хүсэлтэй иргэдэд ямар боломж байгаа болон шинээр ямар таатай нөхцөл бүрдүүлсэн талаар дараах тайлбарыг өгчээ. Тодруулбал, “Гадаадын орнуудад зорчих визийн нөхцөлийг хөнгөвчлөх, олон удаагийн виз авдаг зэрэг зохицуулалтыг Консулын газраас олон улсын хамтын ажиллагааны хүрээнд хийж байна. Тухайлбал, татвар төлдөг тэргүүний бизнесмэнүүдэд олон удаагийн виз олгох асуудал Европын зарим оронд хэрэгжих шатандаа яриа хэлэлцээр хийгээд явж байна.

Ингэснээр татвар төлдөг Монголын бизнесмэнүүд Татварын ерөнхий газрын тодорхойлолтоор олон удаагийн виз авах боломжтой болно. Түүнээс гадна 180 мянган төрийн албан хаагч байна, үүний 10 мянга нь дипломат албан паспорттой. 160 мянган төрийн албан хаагчийн визийг хөнгөлөлттэй нөхцөлөөр олгуулах асуудлыг ярьж байна. Солонгос улсын хувьд визний материал бүрдүүлэхэд төрийн албан хаагчдаас барьцаа мөнгө шаарддаггүй болсон байх жишээтэй. Түүнээс гадна Солонгост виз мэдүүлсэн энгийн иргэдэд банкинд хадгаламжтай байх ёстой гэсэн шаардлагыг тавихаа болиод хоёр сар гаруй хугацаа өнгөрч байна” гэлээ. Ямартай ч Солонгосын виз мэдүүлэхийг хүссэн иргэд барьцаа мөнгө байршуулахын тулд өндөр хүүтэй зээл авдаг байсан бол ийнхүү төрийн албан хаагчдаас авахуулаад хөнгөлөлт эдлээд эхэлжээ.

М.Өнөржаргал