Улсын Онцгой Комиссын ажлын хэсэг Өвөрхангай аймгийн Хархорин суманд ажиллаж, аймгийн Онцгой комиссыг хуралдуулан үер, усны нөхцөл байдал, авч хэрэгжүүлсэн арга хэмжээ, өвөлжилтийн бэлтгэл бэлэн байдлыг хэрхэн хангаж байгаатай танилцлаа.

 Тус аймгийн нутгаар долдугаар сарын 19-ний өдөр орсон усархаг аадар бороо, хүчтэй салхины улмаас Өвөрхангай-Булган чиглэлийн “Хангайн бүсийн цахилгаан дамжуулах сүлжээ” ТӨХК-ийн харьяа 27 тулгуур багана унаж, Архангай,  Баянхонгор, Булган, Дундговь Өвөрхангай, Хөвсгөл, Төв аймгийн нийт 65 сумын цахилгаан тасарсан. Сэргээн засварлах ажиллагааг “Цахилгаан түгээх үндэсний сүлжээ” ТӨХК, түүний салбар, нэгжийн 90 гаруй хүн, 20 техник хэрэгсэлтэйгээр ажиллаж, хэвийн ажиллагаанд оруулсан.

 Мөн аймгийн Уянга сумын нутагт буусан үерийн улмаас 12 айлын 504 бог мал хорогдсон бол  Тарагт сумын нутагт үерийн улмаас гурван айлын гэр урсаж, зургаан айлын 600 гаруй толгой мал хорогджээ. Өвөлжилтийн бэлтгэл ажлын хүрээнд нийт 5818 га талбайд улаан буудай тариалснаас 5358 га талбайгаас урьдчилсан байдлаар 1468,3 тн ногоон тэжээл, 3464,2 тн төмс, 1854,9 тн хүнсний ногоо  хурааж авах тооцоо гарчээ.

 Харин зун гантай байсан Баянгол, Сант,Төгрөг, Гучин-Ус, Баруунбаян-Улаан, Хайрхандулаан, Богд сумдад өвөлжилт хүндрэх эрсдэл үүсэж болзошгүй байгаа урчаас аймгийн Засаг даргын захирамжаар өвөлжилтийн бэлтгэлийг хангуулах нэгдсэн төлөвлөгөө гарган, биелэлтэд хяналт тавин ажиллаж байна хэмээн мэдээллээ.

Мөн үерийн улмаас эвдэрсэн Арвайхээр сумын замын хөвөө, шуудууг 42,6 сая төгрөгөөр, Бүрд сумын Хөөврийн гүүр орчмын эвдэрсэн замыг 54,6 сая төгрөгөөр засварласан байна. Цаашид зам засварын ажил хийхэд 164 сая төгрөг шаардлагатай байгаа гэдгийг Улсын Онцгой комиссын ажлын хэсэгт танилцууллаа.

Шадар сайд Ө.Энхтүвшин, орон нутгийн эрчим хүчний үйлдвэр, нийт аж ахуйн нэгж, байгууллага, иргэдийн өвлийн бэлтгэлийг хангуулж, нүүрс, түлшийг бэлтгүүлэх, шаардлагатай аюулгүйн нөөцийг бүрдүүлэх, орон сууцны цэвэр бохир ус, дулааны шугам хоолой, авто замын засвар үйлчилгээг хугацаанд нь хийж дуусгах, нутаг дэвсгэрийнхээ зуншлага, намаржилтын байдалтай уялдуулан отор нүүдэл хийх байршил, маршрут болон төв суурин газраас алслагдсан өрхийн судалгаа гаргах, сум дундын болон аймаг дундын отрын бүс нутаг, хилийн зурвас газар, байгалийн тусгай хамгаалалттай газруудад отроор өвөлжүүлэх асуудлыг зохион байгуулах үүрэг чиглэл өглөө гэж Онцгой байдлын ерөнхий газраас мэдээллээ.