Хүний амьдралд өвчин, зовлон хэлж биш хийсч ирдэг. Хайртай ханиа харамсалтайгаар алдаж, хэдэн нялх хүүхэдтэйгээ хэцүүхэн амьдарч байсан Ш.Нарангэрэлд монголын ард түмэн сэтгэл, зүрхээ нэгтгэн хандив цуглуулж Баруун салаанд байшин авч өгсөн билээ.

Гэвч төд удалгүй түүний хандивын мөнгийг завшсан мөн ОБЕГ-аас өгсөн хоёр портер нүүрсийг хажуу хашааныхан айлд буулгасан, Өвөр монгол хүн ирээд явсан зэрэг таагүй мэдээлэл хэвлэлийн хуудаснаа хөвөрч эхэлсэн. Тиймээс манай сайтын сурвалжлах багийнхан бодит байдлыг уншигчдад хүргэхээр Баруун салаанд байрлах Ш.Нарангэрэлийн гэрийг зорьсон юм.

Гэрт нь ороход энд тэндгүй хувцас хөглөрч, эмх замбараагүй байдал биднийг угтав. Хүүхдүүд нь сургуульдаа яваагүй өөр хоорондоо хөөцөлдөн тоглож, том охин нь гурван сартай дүүгээ саатуулсан байдалтай дүр зураг нүдний өмнө зурайх.

Гэрийн эзэн Ш.Нарангэрэлд зорьж ирсэн учраа хэлж, түүнтэй хэсэг хором ярилцлаа.

Ш.Нарангэрэл: Намайг уучлаарай. Буруу ойлголтоосоо болж хүний нэр төрд халдчихлаа.

-"Хандивын аянаар 23 сая төгрөг цугласны 11 саяар нь танд байр авч өгсөн. Үлдсэн 11 сая төгрөгийг аяныг зохион байгуулсан Бямбаа хувьдаа завшсан" гэх мэдээлэл хэвлэлд гарсан. Энэ талаар тодорхой мэдээлэл өгнө үү?

-Би тэр талаар буруу ойлгосон байна лээ. Банкнаас дансныхаа хуулгыг авъя гэж бодож байсан ч амжихгүй байлаа. Тэгээд дөрвөн хоногийн өмнө банк орж халамжийн мөнгөө авахдаа дансныхаа хуулгыг авч шалгаж үзсэн. Тэгээд теллерээс нь хэдэн төгрөг орсныг асуухад 23 сая гэж хэлсэн. Мэдээж гайхсан. Тэгээд аяныг зохион байгуулсан Золзаяа, Бодьгэрэл, Бямбаа нартаа хамт дахиад Хаан банк орж эдийн засагчтай нь уулзсан. Данс руу орсон мөнгийг буцааж татаад дахиад буцаагаад хийхээр орлого зарлагын гүйлгээний тоогоор мөнгөн дүн нь нэмэгдэж харагддаг гэж банкныхан тайлбарласан юм. Дансанд 23 сая төгрөг орж ирээгүй юм билээ.

-Ер нь таны данснаас яагаад мөнгийг буцаагаад татаад байсан юм бол?

-Би галаа түлж чадахгүй байсан. Төслийн зуух хэт их утаа гардаг. Тэгээд энэ байшинд амьдарч чадахгүй гэдгээ л хэлсэн. Тэр үед байшингийн мөнгө бүрэн цуглаагүй байсан юм. Тиймээс зохион байгуулж байгаа хүмүүс авчихаж магадгүй гээд буцаагаад мөнгөө татсан.

-Та "Бямбаа намайг дарамталдаг, Өвөрмонгол хүн дагуулж ирсэн нь сэжигтэй санагдсан" гэж хэвлэлд хандсан байсан. Ер нь таныг элдвээр дарамтлаад байдаг юм уу?

-Үгүй ээ. Бямбаа намайг дарамталдаггүй. Би тийм юм огт яриагүй ээ. Сонин дээр гарсан материалыг уншаад гайхаад сууж байна. Арай л хачирлаж нийтэлсэн санагдлаа. Буруу ойлголтоосоо болж Бямбаагийнхаа нэр хүндэд халдсандаа уучлалт гуйж байна. Харин Өвөр монгол хүний тухайд би бас л буруу ойлгосон байна лээ. Байшин авахад Өвөр монголоос дийлэнх мөнгө нь ирсэн. Тэр хүн Монголд ирэхдээ тусласан хүмүүс нь ямар амьдарч байгаатай танилцах гэж манайд ирсэн юм билээ.

Б. Шүрээ: Айлын нүүрс хулгайлдаг луйварчин гээд л хүмүүс дайрч байна

Биднийг ийн ярилцах зуур хөрш айлын эмэгтэй Б.Шүрээ орж ирсэн юм. Түүнийг ОБЕГ-аас өгсөн хоёр портер нүүрсийг гэрийнхээ гадаа буулгаж, дур мэдэн түлж байна гэсэн шүүмжлэл гарах болсон. Түүнээс энэ талаар тодруулахад "Манайх энд амьдраад жил гаруй болж байна. ОБЕГ-ын ажилчид Ш.Нарангэрэл эгчийнд хоёр портер нүүрс буулгах гээд ирсэн. Тэд "Хаана буулгах вэ" гээд эгчээс асуусан. Би хамт байсан учраас та байшингийнхаа урд талд буулгуулчих гэсэн. Гэтэл "танай гэрийн урд буулгачихъя. Тэгээд хоёулаа хуваагаад түлье" гэсэн. Тэгэхээр нь тэгье. Би дуусахаар нь нүүрс авъя гэж хэлсэн. Нүүж ирснийхээ дараа манайх удахгүй нүүнэ гэж хэлэхэд "Ханиндаа байж байгаач. Хэдэн жил амьдарсан ч болно" гэсэн.

Гэтэл нэг өдөр гэнэт манайхыг нүүгээрэй гэж хөөсөн. Би Ш.Нарангэрэл эгчийг байхгүй үед гэрт нь орж, галын түлж, хүүхдүүдэд нь хоол хийж өгч, гэрийн хүртэл цэвэрлэдэг. Айл хүний амь нэг гэсэн сэтгэлээр хандаж, хүүхдүүдэд нь ч санаа тавьж, хичээлд нь хүртэл хүүхдээрээ хоёр охиныг нь хүргүүлж өгдөг. Гэтэл хоёр хоногийн өмнөөс намайг интернэтээр хүний нүүрс хулгайлж түлдэг, хоолын зөөж иддэг хулгайч гээд олон хүн доромжилсон. Нууцалсан дугааруудаас над руу залгаад "Арчаагүй авгай айлын нүүрс хулгайлдаг луйварчин" гэх зэргээр элдвээр дарамталж хүмүүс ярьж эхэлсэн. Ш.Нарангэрэл надруу нүүрс хулгайлж зараад байгаа гэж дайрсан. Бас намайг Бямбаагаас нүүрсийн худалдаж авсан гэж бичсэн байна лээ. Үнэнг хэлэхэд би Бямбаа гэх эмэгтэйг сайн танихгүй шүү дээ. Би төрөөд сар гаруй болж байна. Сэтгэл санааны дарамтанд ортлоо хүмүүст доромжлуулж байна" гэв.

Тус хандивын аяныг зохион байгуулж ажилласан мөн “мөнгө завшсан” гэж яригдаад байгаа Бямбаатай уулзлаа.

Тэрээр "Би бусдын адил эх хүн шүү дээ. Үрээ хайрладаг эх хүний сэтгэлээр зургаан хүүхэдтэй зутруухан амьдарч байгаа Ш.Нарангэрэл эгчид тусалж, өөрийн гэсэн дулаахан, тохитой байшинтай болгохыг зорьсон юм. Монголчууд сэтгэл зүрхээрээ нэгдэж хандивын аян эрчимтэй үргэлжилж Нарангэрэл эгчид хүссэн байшинг нь авч өгсөн. Гэтэл нэг өглөө сэрэхэд би луйварчин Бямбаа нэртэй болчихсон байсан. Хүнд тусалж, дэмжье гэж явдаг байснаас хүний мөнгөнөөс хумслах сэтгэхүй надад байхгүй” гэж хоолой зангируулан ярьсан юм. Ингээд түүнээс цөөн асуултад хариулт авлаа.

Бямбаа: Надад хүний данснаас мөнгө авч захиран зарцуулах ямар ч эрх байхгүй

-Бямбаа гэх нэр сүүлийн хэд хоногт цахим орчинд хөврөх шиг боллоо. Та өөрийгөө танилцуулна уу?

-Намайг М.Бямбаа гэдэг. Би Хамаг Монгол, Ви чат болон фэйсбүүк группын админ хийдэг. Манай групп монголын нийгэмд тулгамдаж байгаа амьдралын боломж тааруу, хүмүүст тусалдаг.

Ш. Нарангэрэл эгчийн мэдээллийг анх ТV8 телевизээр үзсэн. Хандив өгөх зорилгоор гэрт нь очиж бодит байдалтай танилцсан юм. Очиход зохион байгуулалт муутай, зорилт нь ч тодорхойгүй байсан. Зургаан хүүхдийн ирээдүйн сайн сайхны төлөө сэтгэл зүрхээ нэгтгээд хамтраад хандивын аяныг зохион байгуулаад хашаа байшинтай болгох зорилтыг тавьсан.

-Хандиваар яг хэдэн төгрөг цугласан бэ?

-Сайхан сэтгэлтэй хүмүүсийн буянаар 11 сая төгрөг цугларсан. Мөн өөрт нь хүмүүс бэлнээр мөнгөн тусламж өгсөн байсан. Өөрөө бол хүн тусламж өгсөн гэж бидэнд хэлж байгаагүй. Харин хүүхдүүд нь ээжид хүн мөнгө өгөөд явсан гэж хэлдэг. Энэ талаар өөрөөс нь асуухаар “ Өрөндөө өгсөн. Хүн ирээд аваад явлаа” гэх хариултыг өгнө. Нарангэрэл эгчид бэлнээр өгсөн мөнгийг хандивын дансанд хийгээгүй.

-Та 11 сая мянган төгрөг цугласан гэлээ. Гэтэл Ш.Нарангэрэл гуай “банкинд очоод дансныхаа хуулгыг автал 23 сая төгрөг байсан” гэж хэвлэлд хандсан байна лээ. Яг юу болоод байгааг тодорхой тайлбарлаад өгнө үү?

-Нарангэрэл эгчийн өөрийн данс болон хандивын аяныг хамт зохион байгуулалцаж ажилласан Золзаяагийн дансаар мөнгө цуглуулж байсан. Удалгүй бид хоорондоо ярилцаж нэг дансанд мөнгөө цуглуулах хэрэгтэй юм байна гээд Нарангэрэл эгч, Бодьханд нарын нэр дээр хамтарсан данс нээлгээд тухайн дансруу бүх мөнгийг шилжүүлсэн юм. Гэтэл Ш. Нарангэрэл эгч байшинд ороод удаагүй байхдаа “би гал түлж чадахгүй” гэх зэргээр элдвийн ааш зан гаргаж эхэлсэн. Зохион байгуулагчид бид хоорондоо ярилцаад мөнгийг эргүүлэн татах хэрэгтэй гэдэг дээр санал нийлсэн. Тэгээд буцаан таталт хийсэн бас буцаагаад дансанд мөнгө шилжүүлсэн. Иймэрхүү байдлаар хоёр гурван удаа дансанд орлого зарлагын гүйлгээ хийгдсэн. Банкны эдийн засагч орлого, зарлагын гүйлгээ давхарддаг учраас эцсийн дүн 23 сая тегрөг болж харагдаж байгаа гэсэн. Түүнээс дансанд бол 11 сая төгрөг цугларсан гэдгийг Ш. Нарангэрэл эгчид банкныхан тайлбарлаж өгсөн.

-Байшинд амьдрахгүй гал түлж чадахгүй гэсэн яриа сонсогдсон. Байшинг худалдаж авахаасаа өмнө Нарангэрэлд үзүүлсэн юмуу?

-Бид зарын дагуу ярьж байгаад хамт очиж уулзаад байшин үзсэн. Нарангэрэл эгч "маш их таалагдаж байна. Тэндээс нүүгээд хурдан ормоор байна” гээд их баярласан. Бид байшингийн эзэнд учир байдлаа хэлэхэд “ Ах нь хоёр жаахан охинтойгоо амьдардаг ганц бие аав. Зовлон нэгтэй хүмүүс бие биедээ туслалгүй яахав гээд 15 саяынхаа байшинг 11 саяд өгсөн.

-Байшингийн гэрчилгээг нь өөрийнхөн нэр дээр болгож өгсөн үү?

-Байшингийн гэрчилгээ болон газрын кадастр нь Ш.Нарангэрэл эгчийн нэр дээр болгоод өгсөн. Мөн гурван хүүхдийн сургуульд оруулж, хоёр багыг нь цэцэрлэгт хамруулахаар ярьчихсан байгаа.

-Банкнаас мөнгө авах, мөн орлого зарлагын гүйлгээг хэн хариуцаж ажилласан юм бэ?

-О.Бодьханд, Ш.Нарангэрэл нарын хамтарсан данс шүү дээ. Тэгэхээр О.Бодьханд хариуцаж ажилласан. Бид банкны хуулгыг гаргуулж авсан байгаа. Олон нийтэд дэлгэнэ. Нуугаад байх шаардлага байхгүй. Хүн бүхэн сайхан сэтгэл гаргаж, хандивын аянд оролцсон. Намайг хулгайч гээд элдвээр дуудаад байгаа хүмүүст хандаж хэлэхэд банкны хуулгыг нягталж шалгаад сайн харж, хянаарай. Хаанаас хэнээс хэдэн төгрөг орсон нь тодорхой харагдана. Би данс эзэмшээгүй юм чинь надад хүний данснаас мөнгө авах ямар ч эрх байхгүй. Тэгээд ч би өөрийн гэсэн тогтсон амьдралтай гэр бүлтэй хүн.

-Өвөрмонгол хүнийг дагуулж ирсэн гэсэн. Энэ яг ямар учиртай хүн юм?

-Өвөрмонголчууд аянд идэвхтэй оролцож хоёр сая гаруй төгрөг цуглуулж, Ш.Нарангэрэл эгчийн данс руу шилжүүлэг хийсэн. Гэрт нь Машбилэг гэж хүн очсон байгаа. Энэ хүн “Өнөр-бүл” хүүхдийн асрамжийн төвд тусалдаг. Байшиндаа ороод удаагүй байхад нь ажлаар Монголд ирчихсэн байсан. Тусалсан учраас Ш.Нарангэрэл эгчийнд очиж, амьдрал ахуйтай нь танилцах зорилгоор очсон юм.

Түүнээс Ш.Нарангэрэл эгчийн яриад байгаа шиг хүүхдүүдийн нүдлэх,  өөр элдэв бусын муу муухай санаа агуулж, очоогүй гэдгийг хариуцлагатайгаар хэлье. Сайхан сэтгэлээр хүнд тусалсны хариуд ямарч нотолгоо баримтгүйгээр миний нэр хүндэд халдлаа. Намайг нийгэмд адгийн муу луйварчин нэртэй болгоод хаячихсан. Ш.Нарангэрэл эгчтэй уулзаж, энэ талаар хэлсэн. Өөрөө сонинд гарсан нийтлэлээ ч уншаагүй байна лээ. Би бүгдийн уншиж өгсөн. “би ийм юм яриагүй, мэдэхгүй байна” гээд гайхаад байсан.

Залуучууд бидний сэтгэлийг мохойсон хэрэг боллоо. Дахиад нэгдээд хэцүү амьдралтай нэгэндээ туслахаа больчихвий мөн энэ буруу зөрүү ойлголтоос шалтгаалаад хандив хүссэн мянга мянган хүмүүст Монголын ард түмэн итгэхээ больчихвий гэж санаа зовж байна.

Өмнө 

Одоо

С.Ичинхорлоо

www.unen.mn