Э.Бөхбат: Автомашины хуурамч дугаартай жолоочийн эрхийг хасна

Тээврийн хэрэгслийн улсын дугаартай  холбоотой нийтлэг зөрчлийг арилгуулахаар "Улсын дугаар 2019" нэгдсэн арга хэмжээг Тээврийн цагдаагийн албанаас зохион байгуулж эхэлжээ. Тус арга хэмжээний хүрээнд тээврийн хэрэгслийн улсын дугаарын зөрчилд тавих хяналт шалгалтыг улсын хэмжээнд эрчимжүүлэн зохион байгуулж байгаа аж. Энэ тухай Тээврийн цагдаагийн албаны Урьдчилан сэргийлэх хэлтсийн дарга, хурандаа Э.БӨХБАТААС зарим зүйлийг тодрууллаа.

 

-”Улсын дугаар 2019” аяныг яагаад зохион явуулах болов. Энэ хүрээнд ямар ажлуудыг хийхээр төлөвлөж байна вэ?

 

-Жолооч нар дугаарын хязгаарлалтаас үүдэн улсын бүртгэлийн дугаарыг хуурамчаар үйлдэж байна. Энэ мэт зөрчлийг арилгах үүднээс нэг сарын хугацаанд “Улсын дугаар 2019” арга хэмжээг орон даяар зохион байгуулж байна.

 

-Аяны хүрээнд ямар зөрчлүүдэд хариуцлага хүлээлгэх вэ?

 

-Тээврийн хэрэгслийн улсын дугаарын тоо, үсэг нь арилж бүдгэрсэн, засварласан, буруу суурилуулсан, стандартын дагуу хэвлэгдээгүй гэх мэт зөрчлийг илрүүлэн газар дээр нь арилгуулан, Зөрчлийн тухай хуулиар хариуцлага тооцно. Мөн зөрчлийн тухай хуулийн 14.7.11-д Улсын бүртгэлийн дугаар нь арилсан, бүдгэрч үзэгдэх байдал нь муудсан, танигдахгүй бохирдсон, эсвэл дугаарыг буруу байрлуулсан тээврийн хэрэгсэл жолоодож замын хөдөлгөөнд оролцсон бол хувь хүнийг арван нэгжтэй тэнцэх хэмжээний төгрөгөөр, хуулийн этгээдийг нэг зуун нэгжтэй тэнцэх хэмжээний төгрөгөөр торгоно. Мөн улсын бүртгэлийн дугааргүй, эсхүл дугаараа нуун далдалсан тээврийн хэрэгслээр замын хөдөлгөөнд оролцсон бол тухайн жолоочийг хорин таван нэгжтэй тэнцэх хэмжээний төгрөгөөр, хуулийн этгээдийг хоёр зуун тавин нэгжтэй тэнцэх хэмжээний төгрөгөөр торгоно.

 

Улсын бүртгэлийн хуурамч дугаар бүхий тээврийн хэрэгслээр замын хөдөлгөөнд оролцсон бол гурван сарын хугацаагаар жолоодох эрхийг хасч хувь хүнийгтавин нэгжтэй тэнцэх хэмжээний төгрөгөөр, хуулийн этгээдийг таван зуун нэгжтэй тэнцэх хэмжээний төгрөгөөр тус тус торгох юм. Жолооч нарын улсын хуурамч  дугаар хэрэглэсэн, дугаар арилсан зэрэг зөрчилд зарим тохиолдолд эрүүгийн хэрэг үүсгэж шалгах ч магадлалтайг анхаараарай.

 

-Тун удахгүй хичээлийн шинэ жил эхэлж, замын ачаалал нэмэгдэнэ, Үүнтэй холбоотойгоор ямар зохицуулалт хийж байна вэ?

 

-Автомашиныг тэгш, сондгой дугаараар хөдөлгөөнд оролцуулж байна. Мөн 10 хүртэлх насны хүүхдийг тээвэрлэх сургуулийн автобустай болчихвол замын хөдөлгөөний ачаалал тодорхой хэмжээнд багасна гэж үзэж байгаа. Тиймээс энэ асуудалд шаардлага тавьж ажиллана. Хүүхдийг зам тээврийн осолд өртөхөөс урьдчилан сэргийлж олон гарц хийж байна. Мөн зам засварын улмаас хаалттай байгаа замуудыг хугацаанд нь нээлгэхийн тулд нийслэлийн Авто замын газарт санал хүргүүлнэ.

 

Г.Нямсүрэн

Эх сурвалж: "Монголын үнэн" сонин

  • Манай сайт таалагдсан бол лайк дараарай

АНХААРУУЛГА: Уншигчдын бичсэн сэтгэгдэлд unen.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү. Хэм хэмжээ зөрчсөн сэтгэгдлийг админ устгах эрхтэй. 

Сэтгэгдэл (4)

  • Ядарсан замын хөдөлгөөний дүрэм (192.82.65.93)

    2019-08-27

    Замын хөдөлгөөн яагаад дүрэм ч биш явагдаад байна гэвэл цагдаа нар дүрэмийн дагуу шаардлага тавьдаггүй, жолоочоос нуугдаж "зөрчил" илрүүлж торгодогоор САЙН цагдаа болдогт л байгаа юм. Дээр нь бас жолооны сургуулиудын "но", дүрэм зөрчсөн жолоочид үзүүлдэг АРЫН хаалганы "ИВЭЭЛ" -энэ бүгд л УБ-ын гудамжны хөдөлгөөний бахархал болж байх шив дээ.

  • Эрка (202.21.115.126)

    2019-08-26

    Наад амьдралд нийцээгүй зөрчилийн тухай хуурай хуулиа хэзээ болих юм бэ?Ардтүмнийг хохироосон ял зэмийг замын цагдаа хэзээ барагдуулах юм бол.Амьдралд нийцсэн нийцээгүй хууль журам зөвхөн ард түмэнд чиглэсэн хохироосон байдаг.

  • Зочин (122.201.19.99)

    2019-08-26

    Хуурамч дугаар өгсөн цагдаагаа барьж аваач АВЛИГАЧИН цагдаа нар

  • Зочин (64.119.17.235)

    2019-08-26

    Ганц эрхийг нь хасах биш тэр машиныг нь хурааж улсын орлого болгох хэрэгтэй согтуу жолоочийг ч адил төр төмөр нүүрээ адил тэгш харуулах цаг болсон тэгэхгүй бол осол аваараар хүнээ алдаад дууслаа өөрөө өөрсдийгөө хөнөөж мөхөөгөөд аймшиг гамшиг боллоо ер нь согтуу хурд хэтрүүлсэн хуурамч гээд асуудал дээр нэлээд хүндрүүлж байж энэ гамшгаас гарах байх гол нь тэгш шудрага хандах хэрэг зөрчил ихэнх дээ аархсан эрх мэдэлтэй танил талтай хэдэн халтар цаастайдаа эрдсэн нөхдүүд л хийж гаргаж байгаа амьдрах гэж ядаж байгаа хүмүүс тэр бүр хэрэг зөрчил гаргахгүй дээ