Э.Содонтогос: Улаанбаатарчууд ундны усаа үйлдвэрлэдэг болох гэж байна
- 2020-01-15
- Нийгэм
- 0
Удирдсан хамт олныхоо жаргал, зовлонг зүрх сэтгэлээрээ мэдэрч, урагшилж өөдлөхийн хувь заяаг үүрч явдаг нэгэн хүн байдаг. Тэр хүн бол манай сониноос оноож өгсөн нэрээр “Нэгдүгээр хүн” юм.
Манай улс АНУ-ын Мянганы сорилтын корпорацтай байгуулсан эхний Компакт гэрээний хүрээнд төслүүдээ амжилттай хэрэгжүүлж дууссан. Тэгвэл улс орнуудад тэр бүр олдоод байдаггүй боломж буюу хоёр дахь Компакт гэрээг байгуулж, 350 сая ам.долларын буцалтгүй тусламжаар Улаанбаатар хотын нийт ус хангамжийг нэмэгдүүлэх хөтөлбөрийг хэрэгжүүлэхээр болсон билээ. Энэ ажлыг гардан хариуцаж байгаа “Монголын Мянганы сорилтын сан” УТҮГ-ын Гүйцэтгэх захирал Э.Содонтогосыг “Зууны мэдээ” сонин энэ удаагийн “Нэгдүгээр хүн” буландаа урилаа.
-Бидний урилгыг хүлээж авсан танд их баярлалаа. АНУ-аас олгож байгаа буцалтгүй тусламжийг бодит үр дүн болгох хариуцлагатай ажлыг та удирдаж байна. Америкчууд яагаад энэ удаагийн тусламжаа усны салбарт зориулахаар сонгосон талаар ярилцлагаа эхэлье гэж бодож байна?
-Нэгэнт танай сонины энэ хүндтэй буланд зочноор уригдсан болохоор эхнээс нь дэс дараатай ярих хэрэгтэй байх гэж бодож байна. Хөгжиж байгаа орнуудын эдийн засгийн өсөлтийг дэмжиж, ядуурлыг бууруулах нь Мянганы сорилтын корпорацын гол зорилго гэдгийг юуны өмнө хэлье. Америкийн талаас 2014 оны арванхоёрдугаар сард Монгол Улсыг хоёр дахь удаагаа Компакт гэрээ байгуулах боломжтой орноор шалгаруулж, дахин туслалцаа үзүүлэх шийдвэр гаргаснаа мэдэгдсэн. Гэхдээ энэ удаад олон салбарт биш, ул суурьтай судалгаан дээр үндэслэн нэгээс хоёр салбарт төвлөрч, чанартай хөрөнгө оруулалт хийх шаардлага тавьсан юм. Ингээд 2015 оноос судалгаа хийх, төсөл боловсруулах ажлыг хариуцан гүйцэтгэх Үндэсний ажлын албыг байгуулсан. Хөрөнгө оруулах салбараа тогтоохын тулд эхлээд манай улсын эдийн засгийн өсөлтийг хязгаарлаж байгаа хүчин зүйлсийн судалгааг Үндэсний ажлын алба, Үндэсний хөгжлийн хүрээлэнгийн эдийн засагчид Америкийн мэргэжилтнүүдтэй хамтарч хийгээд дараах гол хүчин зүйлсийг тодорхойлсон. Нэгдүгээрт, макро эдийн засгийн орчин сул, тогтворгүй, нэг салбараас буюу уул уурхайгаас хэт хамааралтай байна. Хоёрдугаарт, микро түвшиндээ бодлого, хууль тогтоомж хоорондоо зөрчилтэй, хэрэгжилт уялдаагүй байгаа нь бизнесийн орчинд сөргөөр нөлөөлж байна. Гуравдугаарт, агаарын бохирдол эрүүл мэндийн салбарыг хойш татаад зогсохгүй, улсын эдийн засагт ихээхэн дарамт учруулах нь. Дөрөвдүгээрт, Улаанбаатар хотод удахгүй үйлдвэрийн зориулалттай болон ундны усны хомсдол нүүрлэж, энэ нь эдийн засгийг өсөлтийг хязгаарлах гол хүчин зүйлсийн нэг болох нь. Эдгээрээс гадна, эрчим хүч, боловсрол, эрүүл мэндийн гээд бусад асуудлыг ч эрэмбэлээд ярилцсан л даа. Тэгтэл Мянганы сорилтын корпорацын зүгээс “Бидний олгох буцалтгүй тусламжийн хэмжээ 250 сая ам.доллар. Нэмэгдлээ гэхэд 270 сая л болох байх. Эдийн засгийг төрөлжүүлж дэмжих нь тавхан жилийн зорилт биш, 10, 20 жилээр яригдах стратегийн төлөвлөлт байдаг учир энэ мөнгө хүрэлцэхгүй. Агаарын бохирдлын хувьд өөр шийдэл олсон нь дээр байх, өмнөх гэрээгээр хэрэгжүүлсэн ажлууд ч бий. Энэ Компактаар утаанаас дутахгүй асуудал болох усны хомсдлыг шийдвэрлэхэд тусалъя” гэсэн.
Одоо манай хот гүний усны 10 эх үүсвэрээс тэжээгддэг. Үүний гурав нь цахилгаан станцуудын мэдэлд байна. Үлдсэн долоон эх үүсвэрээс Улаанбаатар хотын нийт хүн амын унд-ахуйн хэрэгцээг хангаж байдаг. Тэдгээр эх үүсвэрийн ихэнх нь Төв цэвэрлэх байгууламжаас дээш байрладаг. Компакт гэрээгээр тусламж авч байгаа бүх улс эдийн засгийн өсөлтийг хангах замаар ядуурлыг бууруулахаас гадна төсөл хөтөлбөрөө байгаль орчинд ямар ч сөрөг нөлөө үзүүлэлгүйгээр хэрэгжүүлэх хатуу үүрэг хүлээдэг. Энэ үүднээс үзвэл ус хангамжийг нэмэгдүүлэхдээ Туул голын дээд хэсэгт байрлах эх үүсвэрүүдийг тэлж, гүний худаг нэмж гаргах боломжгүй. Учир нь дээд эх үүсвэрийг тэлэх тусам Туул голыг тэжээж байгаа эх ундаргыг дундлана гэсэн үг. Нилээд хэдэн жилийн өмнө Туулын ус 14 хоног тасалдахад монголчуудын сэтгэл дагаад ширгэх шиг санагдаж байсан. Туул ширгэнэ гэдэг бол бидний ундны ус ширгэнэ гэсэн үг. Байгаль эхийн маш том тэнцвэр алдагдана. Тиймээс Төв цэвэрлэх байгууламждаа тусламж авахаар Мянганы сорилтын корпорацид дахин хандахад бас татгалзсан хариу өгсөн.
Ингээд эцэст нь усны эрэлт, нийлүүлэлтийг шийдэх замаар Улаанбаатар хотын нийт ус хангамжийг нэмэгдүүлэх хөтөлбөр хэрэгжүүлэхээр болсон доо. Энэ хөтөлбөрийн хүрээнд байгаа нөөцөө шавхах биш, шинэ нөөц, шинэ эх үүсвэрээс ус үйлдвэрлэх юм. Хотын баруун хэсэг буюу Биокомбинат, Шувуун фабрикийн орчимд гүний усны нөөц байдгийг бид мэддэг хэрнээ ямар хэмжээний ашиглалтын нөөц байгааг нарийн тогтоогүй байсан. Эхлээд энэ судалгааг хийж нөөцийг баталгаажуулсан. Дараа нь Төв цэвэрлэх байгууламжийн бохир гүний усанд нөлөөлсөн эсэхийг судлаж үзэхэд тодорхой хэмжээнд нөлөөлсөн байсан. Гэхдээ зөвхөн үүнээс болоод энэ үнэт нөөцийг ашиглахгүй өнгөрөх дэндүү хайран. Бид энэ усыг гүн цэвэршүүлэх үйлдвэрийг Сонгинохайрхан уулын бэлд барихаар болсон. Хөгжингүй орнуудад олон арван жил амжилттай туршсан аргуудыг харьцуулж, гүний усыг маш гүн цэвэршүүлэх замаар ундны болон үйлдвэрийн зориулалтаар ашиглах усыг үйлдвэрлэж, нийслэлийн ус хангамжийн сүлжээнд нийлүүлнэ.
-Монгол Улс Ази тивийн орнуудаас хоёр дахь удаагаа Компакт гэрээ хэрэгжүүлэх боломжит орноор шалгарсан хоёрхон орны нэг болсон нь ховор завшаан гэж хэлж болно.
-Унданд хэрэглэж болохоор гүн цэвэршүүлж чадна гэсэн үг үү?
-Тийм. Энэ үйлдвэрт түүхий усыг мэс заслын нэрмэл ус болтол нь цэвэршүүлж чадна. Өртөг өндөр, гэхдээ маш сайн хүчин чадалтай. Хүссэн хүсээгүй монголчуудад ус хэрэгтэй байна, нөөц хомс байна. Буцалтгүй тусламжаар орж ирж байгаа энэ хөрөнгийг өөрсдийн боломж, бэл бэнчин хүрэхгүй байгаа зүйлдээ хэрэглээд авъя. Монгол Улсын Засгийн газар маш зөв шийдвэр гаргасан гэж би боддог. Одоохондоо хүмүүс ус хомсдоно гэдгийг ойлгохгүй, төсөөлөхгүй байх шиг байна. Бид ерээд оны эхээр картын бараанд дугаарлаж, сахар, талхаа тоотой худалдан авдаг байсан. Түүнтэй адил өдөрт 50 литр ус хэрэглэх хязгаартай болбол яах вэ? Улаанбаатарчууд усны хангамжаа шийдэхгүй бол ийм байдалд орох нь бодит үнэн.
Нөгөө төсөл бол усны эрэлтийг шийднэ. Манай усны гол ашиглагчдын нэг нь дулааны цахилгаан станцууд. Технологийн хувьд зайлшгүй цэвэр ус хэрэглэх шаардлагатай ажиллагаанууд бий. Гэхдээ цамхаг хөргөх, үнс зайлуулах зэрэг техникийн зориулалтаар ч бас л рашаан шиг цэвэрхэн гүний ус ашиглаж байна. Тэгэхээр ДЦС-уудад ийм зориулалтаар хэрэглэж байгаа цэвэр усных нь оронд дахин боловсруулсан ус нийлүүлье гэж байгаа юм. Төв цэвэрлэх байгууламжаас өдөрт 160-250 мянган куб метр цэвэрлэсэн хаягдал ус гарч байгаа. Хаягдал ус дахин боловсруулах үйлдвэр барьснаар үүнээс өдөрт 50 мянган куб метрийг нь бид дахин боловсруулна. Тэр үйлдвэрээс гарах ус бол ундны ус биш, зөвхөн ДЦС-уудад техникийн зориулалтаар нийлүүлэх ус байх юм.
Дэд бүтцийн ийм хоёр том төсөл хэрэгжих гэж байна. Үүнд 350 сая ам.долларыг АНУ-ын Засгийн газар өгнө. Үүн дээр тусламж авч байгаа улсын Засгийн газар 15 хувиас доошгүй хэмжээний хөрөнгө нэмж гаргах ёстой тул дор хаяж 52 сая ам.долларыг манай улс гаргана. Манайд хэрэгжих төслүүдийн хувьд өртөг өндөр тул Засгийн газар үүн дээр 60 орчим сая ам.доллар нэмж, нийтдээ 460 сая ам.долларын хөрөнгө оруулалт хийгдэнэ гэсэн үг.
-Усны салбарт маш том капитал хөрөнгө оруулалт болох нь. Энэ өндөр өртгийг нөхөхийн тулд үнэ тарифын ямар бодлого баримтлах бол?
-Тийм ээ. Үүнийг усны салбарынхан хувьсгал гэж нэрлэж байгаа. Үнэ тарифыг ямар аргачлалаар бодох вэ гэдгийг яг одоо судалж байна. Үндэсний статистикийн хороотой хамт хэрэглэгчдийн саналыг авах судалгааг хийж байгаа. Энд зориуд дурдахад, манай Үндэсний статистикийн хороо асар чадалтай, сэтгэлтэй ажиллаж байгааг энд зориуд хэлмээр байна. ҮСХ-ны дарга А.Ариунзаяа, мөн А.Амарбал дарга болон ажилтнуудад нь маш их талархаж байна. Түүнчлэн усны салбарын засаглалыг бэхжүүлэх, хууль, эрх зүйн орчныг сайжруулах, агентлаг хоорондын уялдаа холбоог хангах гээд бусад асуудалд тодорхой хэмжээнд оролцоод явна. Хөрөнгө оруулалтын тодорхой хэсгийг одоо нийслэлийн ус хангамжийг дангаараа хариуцаж байгаа Ус сувгийн удирдах газрыг чадавхжуулахад зарцуулна. Энэ байгууллага их алдагдалтай ажиллаж байгаа. Үйл ажиллагаа, засвар үйлчилгээний зардлаа орлогоороо нөхөж чадахгүй байна. Гэр хорооллын ус хангамжийг сайжруулахад ч бас тодорхой хөрөнгө оруулалт хийнэ. Картаа уншуулаад хоногийн аль ч цагт ус авах боломжтой ухаалаг худгийн тоог 80 гаруйгаар нэмэгдүүлж, ачилтын худгийн тоог мөн нэмнэ.
-Бүтээн байгуулалт яг хэзээ эхлэх вэ. Төслийн ажил одоо ямар шатандаа яваа бол?
-Бид 2015-2018 онд хэрэгжүүлэх төслүүдийнхээ ТЭЗҮ-үүдийг хийлээ. ТЭЗҮ хийх гэсэн том ажлын санхүүжилтийг мөн Мянганы сорилтын корпорацын буцалтгүй тусламжаар шийдэж чадсан. Өнөөх 350 сая ам.доллараас тусад нь гаргуулсан гэсэн үг. Үйлдвэр барихад ТЭЗҮ гэдэг зөвхөн ерөнхий зураглал. Одоо бид шинэ эх үүсвэр, үйлдвэрийнхээ нарийвчилсан зураг төслийг боловсруулж, бүх нарийн тооцоог гаргаж байна. Байршил, шугам сүлжээний трассыг тогтож, инженер геодези, инженер геологи, гидрогеологи, геофизикийн бүх судалгааг өнгөрсөн зун гүйцэтгэлээ. Ийм нарийн төвөгтэй ажлыг цогцоор нь хийх компанийг сонгон шалгаруулахад дангаараа 6-7 сарын хугацаа шаардлагатай. Олон улсын тендерийн шаардлагын дагуу Америкийн талаас тендерийн бичиг баримтыг боловсруулахаас эхлээд хүртэл өндөр шаардлага тавьдаг.
Компакт гэрээг баталсан гэдэг нь шууд мөнгө орж ирээд, ажил эхэлнэ гэсэн үг биш. Гэрээнд 2018 оны долдугаар сард гарын үсэг зурж, есдүгээр сард тунхаглалаа гаргаад 2019 оны нэгдүгээр сард УИХ-ын чуулганаар соёрхон баталсан. Ингэснээр манай хоёр улсын гэрээ олон улсын гэрээ болж байгаа юм. Одоо гэрээгээ хүчин төгөлдөр болгох том ажил үлдсэн. Хэрэв хүчин төгөлдөр болчих юм бол өнөөх таван жил маань гүйж эхэлнэ гэсэн үг. Таван жилдээ ажлаа багтааж, санхүүжилтээ бүрэн авахын тулд бүх зүйлээ жин тан болгож байж эхлэхгүй бол амжихгүй, хэцүүднэ.
-Төсөл хэрэгжиж дууссанаар онолын тооцооллоор 40, мэргэжилтнүүдийн албан бус яриагаар 100 жилийн ус хангамжийг баталгаатай болгоно.
-Тэгэхээр яарах хэрэггүй байх нь ээ?
-Долоо хэмжиж нэг огтол гэдэг зарчмыг л баримталж ажиллаж байна. Бидэнд алдаа гаргах эрх байхгүй. Тиймээс хэтэрхий яарч болохгүй, бас сунжруулж удаж ч болохгүй. Цаг хугацааг асар нарийн мэдэрч ажиллах хэрэгтэй байна. Дээрээс нь гэрээ хүчин төгөлдөр болохын өмнө Америкийн Засгийн газраас бидэнд бас давхар болзлууд тавьсан. Үүний нэг нь шинэ Төв цэвэрлэх байгууламжид Хятадаас авах санхүүжилтийн гэрээг хийсэн, ажил эхэлсэн байх ёстой гэсэн шаардлага. Энэ асуудал дуншаад л байгаа. Мянганы сорилтын корпорац баталгаатай зүйлд л суурилж мөнгө өгнө. Дээрээс нь Төв цэвэрлэх байгууламж руу орж байгаа хаягдал усны бохирдлыг 2013 оны түвшин буюу түүнээс бага хэмжээнд хүргэж бууруулах нарийвчилсан төлөвлөгөөг боловсруулж баталсан байх ёстой. Бохирдол 2013 онд арай гайгүй байжээ. Одоо Харгиа урьдчилан цэвэрлэх байгууламж бараг ажиллахгүй, хүнд металын агууламжтай ус шууд Төв цэвэрлэх байгууламж руу орж байна. Тиймээс томоохон ус бохирдуулагч үйлдвэр, компаниудыг дэргэдээ бага оврын цэвэршүүлэх байгууламжтай болох шаардлагыг тавьж байгаа. Бас нэг болзол нь УСУГ-ын зардал нөхөх нарийвчилсан төлөвлөгөөг гаргаж өг гэсэн. Мянганы сорилтын корпорац жил бүрийн арванхоёрдугаар сард биднийг үнэлж хуралдана. ТУЗ-ийн дарга нь АНУ-ын Төрийн нарийн бичгийн дарга буюу Гадаад хэргийн сайд нь өөрөө байдаг.
Энэ мөнгөний төлөө улс орнууд жил бүр өрсөлдөж байна. “АНУ-д Монгол ер нь ямар хамаатай юм. Латин Америкийн орнууддаа л тусалж байвал барав” гэж боддог улстөрчид тэнд олон. Танайх ашиглахгүй юм бол Латин Америкийн аль нэг оронд өгье гээд авчихад их амархан. Хамгийн сүүлд л гэхэд өнгөрсөн оны аравдугаар сард Гана Улс гэрээний нөхцөлөө зөрчсөний улмаас 190 сая ам.долларын буцалтгүй тусламжаа цуцлуулсан.
Монгол Улс Ази тивийн орнуудаас хоёр дахь удаагаа Компакт гэрээ хэрэгжүүлэх боломжит орноор шалгарсан хоёрхон орны нэг болсон нь ховор завшаан гэж хэлж болно.
Ер нь АНУ-ын талтай маш зөв харилцаж, мөнгөө хадгалуулахыг хичээж байна. Мэддэг чаддаг бүхнээ л ашиглаж байна даа /инээв/.
-Гэрээ хүчин төгөлдөр болох асуудал зөвхөн төслийн ажлаас хамаарахгүй юм байна. Гэхдээ танд багцаалсан хугацаа байна уу. Та түрүүнд нарийвчилсан зураг төслийн талаар ярьж байсан. Хэзээ дуусах вэ?
– Бид 2018 оны зун олон улсын нээлттэй тендер зарлаж, хамгийн шилдгийг нь шалгаруулсан. АНУ-ын AЭКOM компанитай 2019 оны дөрөвдүгээр сард гэрээ байгуулж, зураг төслийн ажлыг эхлүүлсэн. Сая зураг төслийн 30 хувь нь дуусч, инженерийн магадлалаар ороод ерөнхий зураг гарлаа. Энэ оны гуравдугаар сард 60 хувь, тавдугаар сард 90 хувь гээд долдугаар сард бүх зураг бэлэн болно. Хаана, хэдэн эрэг шураг орох вэ гэдэг нь хүртэл маш тодорхой гарч ирнэ. Ингээд бүтээн байгуулалтын тендерүүдийг олон улсын стандартын дагуу зарлана. Бүтээн байгуулалтын ажилд монгол компаниудыг орж ирээсэй гэж хүсч байгаа. Мэдээж шалгуур нь олон улсын стандартын дагуу маш өндөр тавигдана. Уг нь бидний зорилго бол ирэх оны хавар, зуны барилгын улирлыг ашиглачихмаар байна. Гэхдээ ний нуугүй хэлэхэд амжихгүй бол яана гэсэн айдас бас бий. Барилга угсралтын ажил дангаараа 3.5 жилийг авна шүү дээ. Манайх урт өвөлтэй. Хаана, ямар эрсдэл байгааг мэдэрч, барилгын салбарын эрсдлүүдийг сайтар ойлгож байж эхлүүлэх хэрэгтэй байна л даа. Одоо яг тэр судалгаануудаа хийгээд явж байна.
-Маш олон үе шаттай ажлууд өрнөж байгаа юм байна. Гэтэл усны асуудалд энэ их мөнгийг хийгээд эдийн засгийг яаж өсгөх юм гэсэн шүүмжлэл байна?
-Ус гэдэг бидний амьдралын үндсэн орц. Аливаа үйлдвэрлэл, үйлчилгээний үндсэн түүний эд нь ус. Хүний амьдралын хамгийн суурь хэрэглээ бол ус. Ингээд тодорхойлчиход ойлгомжтой байх. Зуун мянган айлын орон сууц гэхчилэн том том төсөл, хөгжлийн төлөвлөгөөнүүд ярьдаг. Орон сууц барьж болно оо. Харин усгүй бол яах вэ. Өнөөдөр гэр хорооллын нэг иргэн өдөрт багадаа долоон литр, ихдээ 20 литр ус ашиглаж байна. Харин орон сууцанд нэг хүн дунджаар 149 литр ус хэрэглэж байна. Долоон литр ус хэрэглэдэг байсан хүн байранд ороод 149 литрийг хэрэглэдэг болох нь. Энэ ус хаана байна вэ. Нөгөө талаас устай байж, үйлдвэрлэл нэмэгдэнэ. Үйлдвэрлэл нэмэгдэхийн хэрээр эдийн засаг тэлнэ, ажилтай, орлоготой болно.
-Төсөл хэрэгжиж дууссанаар бид усны хомсдол гэсэн айдсаас холуур байх вэ?
-Онолын тооцооллоор 40, мэргэжилтнүүдийн албан бус яриагаар 100 жилийн ус хангамжийг баталгаатай болгоно.
-250 сая ам.доллараар яригдаж байсан шүү дээ. Яаж 350 сая болгосон юм бэ?
-Эрэлт, нийлүүлэлтийн менежментийг хоёуланг нь хийхэд яах ч аргагүй мөнгө хүрэхгүй байсан л даа. Америкчуудын хувьд гэрэлт хөшөө гэдэг шиг анд нөхөд минь бидэнд үүнийг хийж өгсөн шүү гэж дурсах мөр үлдэх нь чухал. Нүдэнд харагдаж гарт баригдах зүйл хийхэд мөнгө хүрэхгүй байна гэсээр нэмүүлж чадсан. Гэрээний хүрээнд хийж ажлууд бүгд шинжлэх ухааны үндэслэлтэй тооцоо судалгаан дээр явж байгаа. Бид давхар их олон судалгаа шинжилгээ баримтыг цуглуулж чадлаа. Энэ дашрамд, мөн бидэнтэй хамтран ажиллаж ирсэн, одоо ч ажиллаж буй БОАЖЯ, Нийслэлийн захиргаа, БХБЯ, ЭХЯ, УСУГ, Хот, суурины ус хангамж, ариутгах татуургын ашиглалт, үйлчилгээг зохицуулах зөвлөл, ОСНААУГ, Дэлхийн банкны дэргэдэх “Усны нөөцийн бүлэг-2030”-ын баг, тэр дундаа Д.Доржсүрэн докторт онцгойлон талархаж явдаг. Бүтээн байгуулалтыг дагаад ирдэг зөөлөн дэд бүтэц гэж бий. Манайд ажиллаж байгаа залуучууд усны талаар маш их мэдлэгтэй болж байна. Тун удахгүй бид олон нийтэд хандсан контентуудыг ч хүргэнэ. Үндэсний хэмжээний, сайн сайхан аж амьдралын суурийг бид тавьж байна. Тиймээс аль нэг байгууллагын жижиг эрх ашгийг хаях хэрэгтэй. Улсаараа хөдөлж байж энэ хөтөлбөрийг хэрэгжүүлнэ. Манай байгууллагын Удирдах зөвлөлд холбогдох яамд, тухайлбал Гадаад харилцааны яам, БОАЖЯ, БХБЯ, Эрчим хүчний яам, Сангийн яам, мөн нийслэл, хувийн хэвшлийн төлөөллүүд бий. Тэд бол асар өндөр хариуцлага үүрч байгаа гэж Монголын мянганы сорилтын сан хардаг.
-Одоохондоо хүмүүс ус хомсдоно гэдгийг ойлгохгүй, төсөөлөхгүй байх шиг байна. Бид ерээд оны эхээр картын бараанд дугаарлаж, сахар, талхаа тоотой худалдан авдаг байсан. Түүнтэй адил өдөрт 50 литр ус хэрэглэх хязгаартай болбол яах вэ? Улаанбаатарчууд усны хангамжаа шийдэхгүй бол ийм байдалд орох нь бодит үнэн.
-Америкийн талаас өндөр шаардлага, хяналт тавьдаг гэсэн?
-Татвар төлөгчдийнхөө мөнгийг бидэнд үнэгүй өгч байгаа юм чинь аргагүй шүү дээ. Бид нэг центийг ч дураараа зарцуулах эрхгүй. Байгууллагын захирал хүн албаныхаа унаагаар гэртээ ирж, очиж болдог доо. Би болдоггүй. Мөнгийг нь төлье гэсэн ч зөвшөөрөхгүй. Нэг талаасаа маш зөв систем. Америкчуудын нэг сайхан юм нь их сайхан тэнүүн сэтгэлтэй, юмыг зөв тайлбарлаад өгөх юм бол зовлонг ойлгох чадвартай. Хамтарч ажиллахад найрсаг, нөхөрсөг. Цаг хугацаа олон юмыг шийддэг юм байна. Тогтвортой, тууштай, үнэнч шударга байж чадвал хамтын ажиллагаа сайхан үр дүнд хүргэдэг. Өнөө маргаашаа бодоод аргацаагаад, ил тод биш, хаалттай харилцаатай явбал хэцүү. Хоёр улс хамтарч ажиллаад 30 гаруй жил болж байгаа болохоор ойлголтын зөрүү улам л багасч байна. Хоёр дахь удаагаа Компакт гэрээ хэрэгжүүлж байгаа нь хамтын ажиллагаагаа амжилтаар баяжуулж байгаагийн бодит жишээ мөн. АНУ-аас Монгол Улсад суугаа Онц бөгөөд Бүрэн эрхт Элчин Сайд Майкл Клеческиг энд бас дурдах ёстой. Биднийг их ойлгож дэмждэг. Мөн Мянганы сорилтын корпорацын Монгол дахь Суурин захирал Алекс Рассин байна. Өмнө нь Армен болон Йорданы Компактыг хэрэгжүүлэхэд МСК-ын Суурин төлөөлөгчийн газрын Захирлаар амжилттай ажилласан туршлагатай. Тэр дундаа дэлхийн хамгийн хуурай, усны хомсдолтай Йордан улсад Усны Компактыг амжилттай хэрэгжүүлэхэд чухал үүрэг гүйцэтгэсэн туршлагатай удирдагч. Ер нь би өдөр тутамдаа монголчууд дэлхий нийттэй нэг хэмнэлээр ажиллаж сурах ёстойг ойлгож, харж байна. Англи хэлтэй байх юу ч биш болж байна. Англи хэлний цаана тэр хөгжингүй орнуудын хүмүүсийн оюун, сэтгэлгээг ухаж ойлгохын тулд өөрийгөө асар их дайчлахыг шаардаж байна. Манай хамт олон ч ингэж хичээдэг. Өндөр чадвартай, дээрээс нь сэтгэлтэй, зөв хандлагатай хүн бидэнд хэрэгтэй. Би багаа тэгж ч бүрдүүлэхийг хичээсэн. Одоо багаараа улам хөгжихийн тулд өдөр бүр хамтдаа урагшилж байна, цаг хугацаатай уралдаж байна. Ер нь гэхдээ зээлээр, буцалтгүй тусламжаар юм хийх хоёр асар ялгаатайг сайн ойлгож байна даа /инээв/.
-Энэ ажлын ард гарчихвал танд ямар мэдрэмж төрөх бол оо?
-Компакт гэрээгээ байгуулчихаад их баярласан. Гэвч цаашаа хийх ажил маш их байгааг бодоод айх үе байсан. Удирдагчийн хувиар энэ айдсаа тэр бүр гаргаж болохгүй шүү дээ. Одоогийн байдлаар надад бусад зүйлд зарцуулах цаг зав үнэхээр алга. Ойрын тав, зургаан жилдээ үүнээс халих боломжгүй. Хүн бүрт улс үндэстнийхээ өмнө ийм том хариуцлага хүлээх хувь заяа тохиохгүй. Энэ хариуцлагын ард амжилттай гарч чадах юм бол үхэхэд ч харамсах зүйлгүй. Үүний ард гарчихвал бусад хүсэл дэндүү жижигхэн санагдана байх. Уйлахаас бусад шаардлагатай бүх л зан аашаа гаргаж явна даа. Угаасаа ч би төмөр шиг хатуу талдаа хүн.
-Энэ чухал ажил үүргийг гүйцэтгэхэд таны үндсэн мэргэжил, гадаад хэлний өндөр мэдлэг маш том суурь чадвар болж байгаа байх?
-Би 2015 оны гуравдугаар сард Үндэсний ажлын албаны даргаар томилогдож байсан. Улмаар Монголын Мянганы сорилтын сангийн нээлттэй сонгон шалгаруулалтад оролцон шалгарч, 2019 оны гуравдугаар сараас Гүйцэтгэх захирлаас ажиллаж байна. Намайг зүгээр л нэг АСЕМ-ийн орчуулагч, энэ төслийн ард гарч чадахгүй гэж басамжилж байсан хүмүүс бий. Гэхдээ энэ чухал биш. Орчуулагч гэдэг өөрөө маш нарийн ажил. Дандаа давхар ухаанаар харна. Орчуулж байгаа болон сонсч байгаа хүний нүүдлийг давхар харна. Шатар тоглохтой л адил. Зарим хүн самбарын өмнө зогсож байгаад “This is an apple” гэдгийг орчуулж байгаатай л адил боддог шиг байгаа юм. Энэ ажлыг хийхэд өнгөрсөн амьдралын замнал минь бүхэлдээ намайг бэлдсэн мэт санагддаг. Төр, хувийн хэвшилд аль алинд нь ажилласан туршлага, сурсан мэдсэн зүйлс, өөртөө хэвшүүлсэн дадал одоо их хэрэг болж байна. Дипломат эдийн засгийн харилцаа гэдгийг хэрэгжүүлж байна. Хотол олондоо ус тээгээд ирнэ дээ мөд.
Б.Солонго
Эх сурвалж: “Зууны мэдээ” сонин
Сэтгэгдэл (0)