УИХ-ын чуулганы хуралдаанаар Эрүүгийн хуульд өөрчлөлт оруулах тухай хуулийн төслийг эцсийн хэлэлцүүлгийг хийлээ. Энэхүү хуулийн төсөлд мал хулгайлах гэмт хэргийн ялыг чангаруулах зохицуулалтыг тусгаж байгаа юм. Тодруулбал, нэг мал хулгайлсан ч зургаан сараас таван жил хорих ял онооно. Харин хүндрүүлэх нөхцөл буюу найман бог, хоёр бодоос дээш тооны мал хулгайлсан, улсын хилээр нэвтрүүлсэн, мал хулгайлахдаа автомашин, техник хэрэгсэл ашигласан, гойд ашиг шимтэй мал хулгайлсан бол 2-8 жилийн хугацаагаар хорих ял оноохоор төсөлд тусгалаа. Мөн амьжиргааны эх үүсвэрээс салгасан бол хүндрүүлэх нөхцөл байдалд оруулсан байна. Харин нийгэмд тустай ажил хийлгэх шийтгэлийг хуулийн төслөөс хасав.

Эцсийн хэлэлцүүлэгтэй холбогдуулан гишүүд асуулт асууж, хариулт авсан бөгөөд Байнгын хороогоор дэмжигдсэн зарчмын зөрүүтэй нэг саналын томьёоллоор санал хураалт явуулсны эцэст хуралдаанд оролцсон гишүүдийн олонхын саналаар хуулиудыг эцэслэн баталлаа.