Монголын хоккейн шигшээ баг Тайландын Бангкок хотноо болсон “Challenge cup 2013” тэмцээнээс хүрэл медаль хүртлээ. Өнөөдөр болсон хүрэл медалийн төлөөх тоглолтод Монголын хоккейчид Кувейтийн шигшээ багийг 11:0-ийн харьцаатай буулган авчээ. Ингэснээр манай тамирчид хоккейн спортын түүхийн хуудаснаа нэгэн шинэ мөрийг бичсэн байна. Тэмцээний хэсгийн тоглолтууд энэ сарын 16-наас 21-ний хооронд Тайландын нийслэл Бангкок хотын “Бангкок Арена”-д болсон. Хэсгийн эхний дөрвөн баг шөвгийн наймд шалгарах зарчмаар тэмцээн үргэлжилжээ. Манай хоккейчид хэсэгтээ Энэтхэгийг 20:0, Макаог 6:1, Сингапурыг 3:2-ын харьцаатай хожсон бол Хонгконгийн багт 7:3-ийн харьцаагаар хожигдсоноор хэсгээсээ хоёрдугаар байраар шалгарсан юм. Улмаар хагас шигшээд үлдэх эрхийн төлөө “Challenge cup” тэмцээний хоёр удаагийн дэд аварга, талбайн эзэн Тайландын багтай тоглож 5:4-ийн харьцаагаар ялж, харин мөнгөн медалийн төлөөх Хонгконгийн багтай хийсэн тоглолтод 4:3-ийн харьцаагаар ялагдал хүлээсэн. Өнөөдрийн тоглолтод Кувейтийн багийг илт давуу ялснаар хүрэл медалийн эзэн боллоо.