Бидний ертөнцөд ер бусын сонирхолтой зүйл тоймгүй олон. Байгалийн тайлагдашгүй хүчин зүйлээс гадна хүн төрөлхтний бий
болгосон хачин жигтэй үйлдэл, дүрэм журам олон байх юм. Зарим оронд үйлчилдэг хачин этгээд ёс журам болон гайхалтай үйл явдлаас тоймлон сонирхуулъя.
Хувийн эзэмшлийн Фүжи уул
Япон улсын өвөрмөц дэг жаяг, хачирхалтай зүйлсээс онцлон хүргэх хэцүү. Тухайлбал, эндхийнхэн Санта- Клаусын оронд хурандаа Сандерс (KFC)-ийг зул сарын бэлгэ тэмдэг гэж үздэг. Мөн дэлхий дахинаа алдартай, тус улсын бэлгэ тэмдэг болсон Фүзияма буюу Фүжи уул нь хувийн эзэмшлийнх гэнэ. 1609 онд сёгун /олон жилийн турш тус улсыг жолоодож байсан хүмүүс/-чууд тус уулыг Хонгю Сенген сүмийн эзэмшилд бэлэглэсэн нь өнөө хүртэл хүчинтэй хэвээр байдаг аж. Тус улсын дээд шүүх 1974 онд энэхүү эзэмших эрхийг нь бататган хэвээр үлдээжээ. Сүмийнхэнд уул ямар хэрэгтэй нь тодорхойгүй ч Японы хувийн өмч хэний мэдэлд байх нь халдашгүй эрх юм даа.
Муургүй нийслэл
Балбын нийслэл Катманду хот нь залбирал, мөргөлийн томоохон төвд тооцогддог. Тэгсэн мөртлөө ариухан амьтдын нэгд тооцогддог муур энд бараг байдаггүй гэнэ. Биологичдын тодорхойлсноор хот муургүй болсон шалтгаан нь макаки сармагчинтай холбоотой аж. Тус хотод макаки сармагчин үй олноороо амьдардаг тул хөөрхий муурнуудад модны ард нуугдаад ч болов амьдрах боломж олгоогүй гэнэ.
Толгойгоороо байрласан хөшөө
Австралийн Мельбурн хотноо толгой дээрээ зогссон хүний хөшөө бий. Их Британийн колончлолд байсан Виктория хотын / өдгөө муж/ захирагч асан Чарльз Ла Тробегийн хөшөө ийм байрлалтай оршдог аж. Энэхүү ер бусын хөшөө нь ард иргэдийн зүгээс аугаа хүнийг доромжилсон гэх олон таагүй тодотгол, хэл ам дагуулдаг ч өнөө хүртэл Ла Тробагийн их сургуулийн үүдэнд оршсоор байна.
Монокагийн үндэсний оркестр армиасаа олон хүнтэй
Манай гаригийн хамгийн жижигхэн орнуудын нэг Монако улсын цэргийн арми 82 хүнээс бүрддэг. Энэ нь бусад орны цэргийн ангийн зөвхөн нэг хороотой тэнцэхүйц тоо гээд бодохоор ямархуу жижиг орон нь тодорхой. Хамгийн хачирхалтай нь эл жижигхэн улсын үндэсний найрал хөгжмийн баг нь улсынхаа армиас олон хүний бүрэлдэхүүнтэй. Тус улсын үндэсний оркестр 86 хүнээс бүрддэг нь урлагийг хүчний байгууллагаас ч илүүд үздэгээ илэрхийлж буй гэлтэй.
Үхэхийг хориглосон хот
Норвегийн Свальбард мужийн Лонгийр хотноо нас барах хуулиар хориотой. Хэрэв энд гэнэтийн азгүй тохиолдлоор амь насаа алдах юмуу хүнд өвчний улмаас амиа алдахад ойрхон очсон тохиолдолд яаралтай өөр хот уруу шилжүүлдэг байна. Энэхүү ер бусын хууль нь мухар сүсэг, тэнэг байдал, уламжлал, ёс жаягийн алинтай нь ч хамааралгүй гэнэ. Харин газар нутаг, цаг уурын онцлогтой холбоотой аж. Тус хот ердөө л хоёр мянга гаруй хүн ам /2007/-тай бөгөөд газрын хөрс нь мөнхийн цэвдэг байдаг тул нас барсан хүний цогцос газарт шингэдэггүй бөгөөд газар доороос нэвт үнэртдэг нь ойр хавийн аймшигт махчин амьтдыг уриалан дуудах шалтгаан болдог байна. Дашрамд сонирхуулахад, Их Британийн Парламентын ордонд ч мөн нас баралтыг хориглодог.
Америкчууд өдөрт 18 га-тай тэнцэхүйц пицца иддэг
Америкчуудыг пиццагүйгээр төсөөлөхийн аргагүй. Тэд энэхүү түргэн хоолноосоо хэзээ ч уйддаггүй төдийгүй зарим өрх гэрийн хувьд бараг өдөр тутмын хоолны цэсэнд ордог гэнэ. Тиймдээ ч америкчуудын хамгийн өргөн хэрэглэдэг энэхүү хоолны өдрийн хэрэглээг мэргэжилтнүүд судалсны үндсэн дээр 18 га талбайтай тэнцэх хэмжээний том пицца иддэгийг тогтоожээ.
Таргалахыг хуулиараа хориглосон улс
Сумо бөхийн эх орон Япон улсад тарган байхыг хуулиар хориглодог гэнэ. Энэхүү хачирхалтай хууль 2009 оноос үйлчилж буй агаад хуулийн заалтад 40 наснаас дээшх эрчүүдийн бүсэлхийн хэмжээ 80 см, эмэгтэйчүүдийнх 90 см-ээс их байх ёсгүй тухай тусгажээ. Энэ нь мэдээж сумо бөхтэй хамааралгүй л болов уу. Харин иргэдийнхээ эрүүл мэнд, ажил албанд санаа тавьсны үүднээс л ийм хууль хэрэгжүүлсэн байх. Учир нь тус улсын метронд тарган хүмүүсийг хаалгаар түлхэн оруулдаг тусгай ажилчид байдаг.