“Save olympic wrestling” буюу “Чөлөөт бөхөө аваръя” арга хэмжээний хүрээнд АНУ-ын Нью-Йорк хотын Төв галт тэрэгний буудалд энэ сарын 15-нд чөлөөтийн шилдгүүдийн халз барилдаан боллоо. Энэхүү халз барилдаанд чөлөөт бөхийн хүчирхэг гүрнүүдийн төлөөлөл АНУ, ОХУ, Иран улсын тамирчид хүч үзсэн байна. Олон улсын олимпийн хорооны гүйцэтгэх хорооноос 2020 оны олимпийн наадмын албан ёсны хөтөлбөрт спортын 25 төрлийг багтаахаар санал оруулахад чөлөөт бөхийн төрөл багтаагүй билээ. Иймд олон улсын бөхийн төрлүүдийн холбоо болох ФИЛА-гаас эсэргүүцэн, дээрх саналаа эргэж харахыг уриалаад байгаа бөгөөд улс орнуудын бөхийн холбоодод чөлөөт бөхийг хөгжүүлэхэд идэвх зүтгэл гаргаж ажиллахыг үүрэг болгоод байгаа. Үүний дагуу АНУ, ОХУ-ын бөхийн холбоодоос бөхийн өдрүүд явуулах санаачилга гарган ажиллаж байна. Олон улсын бөхийн төрлүүдийн холбоо 2013 оны тавдугаар сарыг Дэлхийн бөхийн сар болгон зарласан билээ.

Б.Сэлэнгэ