Банкууд 2014 оны 7 дугаар сард нийт 1440 зээлдэгчид 77.4 тэрбум төгрөгийн ипотекийн  зээл шинээр олгосноор банкуудын ипотекийн зээлийн үлдэгдэл 2492.1 тэрбум төгрөг, нийт зээлдэгчдийн тоо 59756-т хүрчээ.
Тайлант сарын эцэст банкуудын ипотекийн зээлийн үлдэгдлийн жилийн өсөлтийн хурд өмнөх сартай харьцуулахад 40.6 нэгж хувиар, оны эхнээс 33.6 нэгж хувиар буурсан ч өмнөх оны мөн үеэс 25.4 нэгж хувиар нэмэгдсэн байна.

Банкуудын ипотекийн зээлийн үлдэгдлийн нэрлэсэн дотоодын нийт бүтээгдэхүүнд эзлэх хувь “Орон сууцны ипотекийн санхүүжилтийн тогтвортой тогтолцоог бүрдүүлэх хөтөлбөр” (ОСИСТТБХ)-ийн хэрэгжилттэй холбоотойгоор 2013 оноос эхлэн эрс нэмэгдсэн байна.

Тайлант сарын эцэст банкуудын ипотекийн зээлийн үлдэгдлийн 69.3 хувь буюу 1728.2 тэрбум төгрөгийг “Орон сууцны ипотекийн санхүүжилтийн тогтвортой тогтолцоог бүрдүүлэх хөтөлбөр”-ийн зээл (8 хувийн хүүтэй зээл болон 8 хувийн хүүтэй зээлд шилжүүлсэн зээл), 27.8 хувь буюу 692.1 тэрбум төгрөгийг банкуудын өөрийн эх үүсвэрээр олгосон зээл, 2.9 хувь буюу 71.8 тэрбум төгрөгийг бусад эх үүсвэрээр олгосон зээл бүрдүүлж байна.

2014 оны 7 дугаар сарын байдлаар ипотекийн зээлийн үлдэгдлийн 97.7 хувь нь төгрөгийн зээл, 2.3 хувь нь гадаад валютын зээл байна.
Ипотекийн зээлийн үлдэгдэлд эзлэх чанаргүй зээлийн хувь харьцангуй тогтвортой байгаа бөгөөд 2014 оны 7 дугаар сарын байдлаар 0.4 хувь байна.

Тайлант сард олгосон зээл

Тайлант сард шинээр олгосон зээлийн 67.5 хувь буюу 52.2 тэрбум төгрөг нь “Орон сууцны ипотекийн санхүүжилтийн тогтвортой тогтолцоог бүрдүүлэх хөтөлбөр”-ийн зээл, 32.4 хувь буюу 25.1 тэрбум төгрөг нь банкуудын өөрийн эх үүсвэрээс олгосон зээл байна.

Зээлдэгчдийн тоо

Тайлант сард нийт 1440 иргэн шинээр ипотекийн зээлд хамрагдсанаас 878 иргэн “Орон сууцны ипотекийн санхүүжилтийн тогтвортой тогтолцоог бүрдүүлэх хөтөлбөр”-ийн зээлд, 561 иргэн банкны өөрийн эх үүсвэрийн зээлд хамрагдсан байна.

2014 оны 7 дугаар сарын байдлаар нийт 59756 иргэн ипотекийн зээлтэй байгаагаас 39507 нь “Орон сууцны ипотекийн санхүүжилтийн тогтвортой тогтолцоог бүрдүүлэх хөтөлбөр”-ийн зээлд, 18161 нь банкуудын өөрийн эх үүсвэрийн зээлд, 2088 нь бусад эх үүсвэрийн зээлд хамрагдсан байна.

Зээлийн хугацаа

Тайлант сард банкууд 0.5-20 жилийн хугацаатай зээл олгосон бөгөөд  жигнэсэн дундаж хугацаа нь 15.7 жил байна. Ипотекийн зээлийн үлдэгдлийн жигнэсэн дундаж хугацаа 2014 оны 7 дугаар сарын байдлаар 15.0 жил байна.
Тухайн сард олгосон зээлийн дийлэнх буюу 48.8 хувь 16-20 жилийн хугацаатайгаар олгогдсон. Нийт ипотекийн зээлийн үлдэгдлийн 42.0 хувь нь 16-20 жил, 28.1 хувь нь 11-15 жил, 16.4 хувь нь 6-10 жил, 3.7 хувь нь 1-5 жилийн хугацаатай байна.

Нийт олгосон зээл аймгуудаар

2014 оны 6 дугаар сарын байдлаар

2014 оны 6 дугаар сарын байдлаар банкуудын ипотекийн зээлийн үлдэгдлийн 76.7 хувийг Улаанбаатар хотод, 23.3 хувийг хөдөө орон нутагт олгосон ипотекийн зээл бүрдүүлжээ. Хөдөө орон нутаг дахь ипотекийн зээлийн үлдэгдлийн 16.6 хувь буюу 94.3 тэмбум төгрөг Дархан-Уул аймагт, 15.0 хувь буюу 85.2 тэмбум төгрөг Орхон аймагт, 9.0 хувь буюу 51.5 тэрбум төгрөг Дорноговь аймагт ногдож байна.

МОНГОЛБАНК