Оросын Ерөнхийлөгч В.Путин шинэ он гарахын өмнөхөн хийдэг уламжлалт хэвлэлийн бага хурлаа өнгөрсөн баасан гаригт хийжээ. Энэ үеэр сэтгүүлчид түүнд өөрийн асуултаа тавихаар эртнээс бэлддэг болсон аж. Энэ оны хэвлэлийн бага хурал нь түүний хувьд 10 дахь нь бөгөөд нийт гурван цаг 10 минут үргэлжилсэн байна. Хэвлэлийн хурал Москва дахь Олон улсын худалдааны төвд болсон бөгөөд Оросын томоохон телевиз, радио сувгууд шууд дамжуулсан юм. Хурлын анхны асуулт тавих эрхийг Кремлийн ахмад сэтгүүлчдийн нэгт өгч, тэрбээр газрын тосны үнэ унасан, үүнтэй холбоотойгоор рублийн ханш унасан талаар Төв банк болон Засгийн газрын үйл ажиллагаанд шүүмжлэлтэй хандаж байгаа эсэх талаар асуусан юм. В.Путин Оросын Төв банкны тэргүүн Эльвира Набиуллина болон Засгийн газарт чиглэсэн шүүмжлэлийн тухай мэдэж байгаа тухай хэлж, уг шүүмжлэл зарим талаар ортой боловч ерөнхийдөө тэднийг зөв ажиллаж байгаа гэж дүгнэжээ. Гэхдээ зарим нэг алхмыг илүү шуурхай авч хэрэгжүүлж болох байсан бөгөөд аливаа үйл явцаас “Хагас алхмын өмнө хийж хэрэгжүүлж байх ёстой” гэжээ. Түүнчлэн шаардлагатай гэж үзвэл бензин, өргөн хэрэглээний барааны үнийг хянах талаар эдийн засгийн салбарт“Гар ажиллагаа”-ны(шууд удирдах) горимд шилжих хэрэгтэйг өгүүлж, тус улс энэ хямралыг давж, эдийн засгаа өөд нь татаж чадна гэсэн илтгэлтэй байгаагаа илэрхийлсэн байна. В.Путин иргэдэд хандан эдийн засгийн хувьд хүнд үе ирж байгааг сануулсан боловч хоёр жилээс хэтрэлгүй дэлхийн эдийн засаг сэргэнэ гэдгийг хэлсэн аж. Харин энэ хугацаанд Орос орон эдийн засгийн бүтэцдээ өөрчлөлт хийж, газрын тосны үнэ бага нөхцөлд дасан зохицож чадна гэдгийг хэлсэн юм. Харин тэр болтол Оросын алт, валютын нөөц бэрхшээлээс гарахад тусална гэдгийг хэлсэн аж. Тэрбээр Төв банк, Засгийн газраас рублийн ханшийг барих талаар авч хэрэгжүүлсэн арга хэмжээнүүдийг “зөв” гэж үнэлээд бодлогын хүүг17 хувь хүртэл огцом нэмэгдүүлсэн нь зах зээлийн эдийн засгийн унааны хувьд үндэслэлтэй болохыг хэлсэн байна. Оросын алт, валютын нөөц420 тэрбум ам.доллартай тэнцэхүйц хэмжээтэй байгаа нь эдийн засаг, нийгмийн салбар дахь бэрхшээлүүдийг давахад тус болохуйц ихээхэн нөөц юм. Гэхдээ энэ нөөц бүх асуудлыг шийдвэрлэхэд хүрэлцэх эсэх нь эргэлзээтэй. Учир нь энэ нөөцийг гадаад валюттай харьцах рублийн ханшийг барихаас гадна төсвөөс цалинждаг ажилтнууд болон тэтгэвэр, тэтгэмж авдаг иргэдэд зарцуулах шаардлага гарна. Учир нь Ерөнхийлөгч эдгээр иргэдийн цалин, тэтгэмжийг инфляцитай уялдуудан индексжүүлэхээр болсон. Үүнтэй холбоотойгоор төсвийн зардал нэлээд нэмэгдэх юм. Дээр нь банкууд болон төрийн өмчит“Роснефть”, “Газпром” болон Оросын төмөр зам компанид нэлээд хэмжээний санхүүгийн дэмжлэг шаардлагатай байгаа юм. Оросын томоохон компаниуд 2015 оныг дуустал гадаадын банкуудаас авсан130 тэрбум орчим ам.доллараа эргүүлэн төлөх аж. Гэтэл барууны орнуудаас хориг тавьсан өнөөгийн нөхцөлд Оросын компаниуд тэдгээр орноос дахин зээл авах, хөрөнгө босгох боломжгүй болсон нь нэрмээс болно. Ийм нөхцөлд эдийн засагтаа бүтцийн өөрчлөлт хийхэд шаардлагатай их хэмжээний хөрөнгө оруулалт хийхэд нэлээд бэрхшээл тулгарна. Оросын эдийн засгийн өнөөгийн бүтэц цаашид өсч хөгжих боломж олгохгүй байна. В.Путин газрын тосны үнэ өндөр байх үед бизнес эрхлэгчид аль болох ахиу орлого олох боломжтой салбарт хөрөнгө оруулж, бусад салбар орхигдож байсныг хэвлэлийн бага хурал дээр хүлээн зөвшөөрсөн. В.Путин Орос улсад тавьсан хориг арга хэмжээ, барууны орнуудын дайралт нь Крымтэй холбоогүй харин улс орныхоо эрх ашгийг нэн тэргүүнд тавьсан тус улсыг нугачин дарах гэсэн дайралт, дайн гэдгийг тайлбарласан байна. Тэрбээр энэ тухай ярихдаа Орос орныг тайга дахь баавгайтай зүйрлэжээ. В.Путин“Заримдаа баавгай ойдоо гахай хөөж явсанаас чимээгүй суух нь зүйтэй байдаг. Тэр зуураа оронд жимс, зөгийн бал иддэг. Тэгвэл тэд тайван суулгаж магадгүй юм. Гэхдээ тэд тэгэхгүй. Учир нь тэд баавгайг байнга л гаршуулж, гинжлэхийг оролдох бөгөөд тэгж чадвал хумс, шүдийг нь сугалж авна” гэжээ. Харин хумс, шүд гэдэг Оросын цөмийн зэвсэг гэдгийг тайлбарласан байна. Тэгээд хумс, шүдийг нь сугалж авмагц баавгай хэрэггүй болно. Тэгээд арьсыг нь хуулж, чихмэл хийнэ” гэсэн байна. В.Путин “Гол асуудал бол Крым биш харин бид бүрэн эрхт байдал, оршин тогтнох эхийнхээ төлөө тэмцэж байгаад юм” гэжээ.

Д.Болд