Томуу, томуу төст өвчний тархалт нэмэгдэж буй тул эмнэлгүүд уртасгасан цагаар ажиллах болсон. Энэ талаар Нийслэлийн Эрүүл мэндийн газрын Халдварт өвчний тандалт хариуцсан мэргэжилтэн Б.Баатарсүхээс тодрууллаа.

-Одоогийн байдлаар томуу, томуу төст өвчний дэгдэлт хэр их байна вэ?

-Томуу, томуу төст өвчний дэгдэлт өмнөх жилийн мөн үеэс 4.3 хувиар нэмэгдсэн. Амбулаториор үйлчлүүлсэн нийт иргэдийн 80 орчим хувийг 0-9 насныхан эзэлж байна. Тиймээс өрхийн эмнэлгүүд ажлын өдөр 17.00-19.00, бямба гаригт 10.00-14.00 цагийн хооронд ажиллаж, иргэдэд уртасгасан цагаар үйлчилж байна.

-Баярын өдрүүдэд ч гэсэн энэ хуваариар ажиллах уу?

-Бид томуугийн дэгдэлтийг ажиглаж байна. Дэгдэлт тодорхой хэмжээнд бууртал эмнэлгүүд уртасгасан цагаар ажиллах болно.

-Эмч, сувилагчдын илүү цагийн цалинг хэрхэн зохицуулах вэ?

-Тухайн эмнэлэг өөрсдийн нөөц бололцоогоор илүү цагийн мөнгийг зохицуулж байна. Мөн эмч ажилчдаа тодорхой хугацаагаар амраах, тэдний ажиллах цагийг хуваарилах зэрэг арга хэмжээ авч байгаа.

Ц.ЗАЯА