ШӨХТГ-ын даргын албан тушаалд томилогдоод удаагүй байгаа Т.Аюурсайхан өчигдөр сэтгүүлчидтэй уулзаж, нээлттэй ярилцлага өрнүүллээ. Мөн тэрбээр цаашид хийх ажлынхаа талаар мэдээлэл өгсөн юм. Энэ үеэр түүнтэй цөөн хором ярилцлаа.

-ШӨХТГ-ын зүгээс энэ жил ямар ажил хийхээр төлөвлөж байна вэ?

-ШӨХТГ хэрэглэгчдийн эрх ашиг болон Өрсөлдөөний тухай хуулийн хэрэгжилтэд хяналт тавьж ажиллах үүрэгтэй байгууллага. Тийм ч учраас энэ жил хэд хэдэн ажил хийхээр төлөвлөсөн. Үүнд, хууль эрх зүйн орчныг боловсронгуй болгох, зах зээлд шударга өрсөлдөөнийг бий болгох нөхцөлийг хангах, хэрэглэгчийн эрхийг хамгаалах, хууль бус зар сурталчилгааг таслан зогсоох, байгууллагын гадаад харилцааг бэхжүүлэх, төрийн захиргаа, удирдлагын системийг бэхжүүлэх зэрэг хэд хэдэн үндсэн зорилт тавьж ажиллахаар төлөвлөж байна.

-Ойрын хугацаанд ажлын хэсэг байгуулж ажиллах тухай ярилаа. Энэ талаар тодруулна уу?

-Ойрын хугацаанд хийх шаардлагатай хэд хэдэн ажил байна. Үүнээс үүдэн гурван ажлын хэсэг байгууллаа. Нэгдүгээрт, үнэ тогтворжуулах хөтөлбөрийн хүрээнд тодорхой компаниудад хөнгөлөлттэй зээл олгохоор болсонтой холбоотойгоор зээлийн ашиглалт, Өрсөлдөөний тухай хууль болон холбогдох бусад хуульд нийцэж байгаа эсэхийг шалгана. Хоёрдугаарт, эрчим хүчний асуудалтай холбоотой ажлын хэсэг байгуулсан. Энэ нь цахилгаан, дулааны үнийн өсөлттэй холбоотой судалгаа хийж, түүнд хяналт шалгалт хийнэ. Гуравдугаарт, шатахууны үнэтэй холбоотой ажлын хэсгийг байгуулсан. Шатахууны компаниуд үнэ тогтворжуулах хөтөлбөрийн хүрээнд төрөөс багагүй хэмжээний дэмжлэг аваад үйл ажиллагаагаа явуулж байгаа. Олон улсын зах зээл дээр шатахууны үнэ нэлээн буурч байгаа учир олон нийтийн дунд манайд ч гэсэн түлш шатахууны үнийг бууруулах боломжтой эсэх талаар хүлээлт үүсгээд байна. Тиймээс дээрх гурван ажилд эхний ээлжид анхаарал хандуулж ажиллахаар болоод байна.

-Нийслэлчүүдийн хувьд махны үнэ толгойны өвчин болдог. Жил ирэх тусам нэмэх махны үнэ ченжүүдийн гар дамжсаар дунджаар5000 орчим төгрөгөөр нэмэгдэж хэрэглэгчийн гар дээр очдог. Энэ тал дээр ямар арга хэмжээ авах вэ. Үүнийг хуулийн хүрээнд зохицуулах арга бий юү?

-Хуулийн хүрээнд жижиглэнгээр мах борлуулагчдад ямар нэгэн арга хэмжээ авах боломж хомс байдаг. Өрсөлдөөний тухай хууль, Хэрэглэгчийн эрхийг хамгаалах зэрэг хуульд нийцэж байгаа эсэхэд өнөөдрийг хүртэл хяналт тавьж ажилласаар ирсэн. ШӨХТГ-ын зүгээс махны үнээр тодорхой судалгаа хийж холбогдох байгууллагуудад хүргүүлсэн. Мах малчдын гараас хэрэглэгчдэд очих хүртлээ хамгийн багадаа дөрвөөс доошгүй шат дамжлага дамждаг. Тиймээс цаашид энэ тал дээр шат дараалалтайгаар арга хэмжээ авч ажиллахаар ажлын хэсэг байгуулахаар хэлэлцэж байна.

-Арилжааны банкууд хэрэглэгчдээс хууль бусаар үйлчилгээний зардал, зээл, авахад нэг хувийн шимтгэл авдаг гэсэн асуудлыг сөхөж шалгахад шүүхийн шийдвэр танай талд гарсан. Энэ асуудалд цаашид хэрхэн хандах вэ?

-Анхан шатны шүүхийн шийдвэр гараад хариу нь өнгөрсөн долоо хоногт албан ёсоор манайд ирсэн. Арилжааны банкууд хэрэглэгчдээс ямар ч үндэслэлгүй шимтгэл авсан гэсэн хариу гарсан. Мөн манай шаардлагыг хүлээж аваагүй арилжааны есөн банк бий. Тэд давж заалдвал дараагийн шатны шүүх хурал болох байх. Одоогийн байдлаар эцсийн шийдвэр гараагүй. Хэрэв эцсийн шийдвэр энэ чигээрээ гарах юм бол зээл авсан иргэд, аж ахуйн нэгжүүд иргэнийхээ журмаар илүү төлсөн мөнгөө буцааж авах хүсэлтээ гаргах боломжтой болно.

-“MCS” групп Мобикомын хувьцааг худалдаж авах гэж байгаа гэсэн мэдээлэл байна. Зах зээл дээр давамгайлагч хоёр компани бие биеийнхээ хувьцааг худалдаж авбал монополь эрх үүсэх магадлалтай. Энэ тал дээр ямар байр суурьтай байна вэ?

-Хуулийн хүрээнд яривал ижил төрлийн үйл ажиллагаа явуулж буй компаниуд нэг нэгийнхээ энгийн хувьцааны25 хувиас дээш, давуу эрхийн хувьцааны 15-аас дээш хувийг худалдаж авахаар бол заавал зөвшөөрөл авах ёстой байдаг. Ийм зөвшөөрөл авах хүсэлтээ одоохондоо манайд ирүүлээгүй. Хэрэв энэ хүсэлт ирэх юм бол бид тодорхой хэмжээний судалгаа хийж байгаад дүгнэлт гаргана. Ажилд томилогдсоноосоо хойш судалгаа явуулж байна.

-ШШГЕГ-ын харьяа хорих ангиудад шалгалт хийсэн гэсэн. Уг шалгалтын дүн гарсан уу?

-Өнөөдрийн байдлаар ШШГЕГ-ын харьяа хорих ангиудад шалгалт хийж байна. Шалгалтын дүнг тодорхой мэдээлэх болоогүй. Шалгалтаа дуусгаж дүнгээ нэгтгэж байж мэдээлэл хийнэ.

-Төрийн байгууллага ажилчдаа цомхотгож байна. ШӨХТГ орон тоогоо цомхотгосон гэсэн. Одоогоор хэчнээн ажилчинтай үйл ажиллагаагаа явуулж байна вэ?

-Засгийн газар болон УИХ-ын шийдвэр гарсан та бүхэн мэдэж байгаа. Төрийн байгууллага болон яам, агентлагуудын бүтцэд өөрчлөлт орсон. Энэ хэрээр ажилчдынхаа 15 хувийг цомхотгоод эхэлсэн. Үүний дагуу манай байгууллага 15 хувиа цомхотгож одоогоор 35 хүний бүрэлдэхүүнтэй ажиллаж байна.

-Танайд ирсэн гомдлоос шүүхийн шатанд хэлэлцэж буй ямар асуудлууд байна вэ?

-Орон сууцны метр квадрат, цирк, МУИС-ийн оюутан шилжүүлэхдээ авсан төлбөрийн асуудал, эрчим хүчний цахилгааны үнэ зэрэг асуудлыг шүүхийн шатанд хэлэлцэж байна.

-Барьцаалан зээлдүүлэх төв хэрэглэгчдийг хохироож байна гэсэн гомдол их ирсэн гэсэн. Үүнд хэзээ хяналт шалгалт хийх вэ?

-Энэ төрлийн үйл ажиллагаа явуулдаг байгууллагууд үйлчлүүлэгчдээ хохироодог гэсэн гомдол манайд нэлээд ирсэн. Гомдлын дагуу барьцаалан зээлдүүлэх төв болон банк бус санхүүгийн байгууллагад хяналт шалгалт хийхээр төлөвлөж байна. Эхний ээлжид төлөвлөж ажлын хэсэг байгуулсан ажлаа шалгаж дуусгана. Дараа нь хийхээр төлөвлөсөн ажил олон байна.

Д.Нэргүй