Катарын “Аль-Жазира” агентлагийн гурван сэтгүүлчийг Парисын тэнгэрт багавтар хэмжээтэй нисгэгчгүй онгоц хөөргөснийх нь төлөө баривчилжээ. Сэтгүүлчид Парисын захын дүүрэг дэх цэцэрлэгт хүрээлэнд нисгэгчгүй залуурт онгоц/дрон/ хөөргөн дүрс бичлэг хийж байсан гэнэ. “Аль-Жазира”-гийн сэтгүүлчдийг өмнө нь Парист дрон онгоц хөөргөсөн хэрэгтэй холбоотой эсэх нь тодорхойгүй аж. Өнгөрсөн лхагва гаригт шилжих шөнө Парис дахь Эйфелийн цамхаг, АНУ-ын Элчин сайдын яам зэрэг хотын зарим хэсгийн дээгүүр дрон онгоц ниссэн хэрэг гарсан нь алан хядах ажиллагаатай холбоотой гэсэн хардлага төрүүлсэн юм. Нэг сарын өмнө ийм төрлийн онгоц Францын Ерөнхийлөгчийн ордны дээгүүр нисч өнгөрсөн боловч хууль сахиулах байгууллагынхан ямар нэг арга хэмжээ авч чадаагүй байна. Францад өнгөрсөн нэг жилийн хугацаанд үүнтэй төстэй хэдэн арван хэрэг бүртгэгдсэн аж. Тэдгээр нь энгийн хэрэглэгчдэд худалддаг 10 кг хүртэл жинтэй энгийн дрон онгоц байсан тул тус улсын цөмийн цахилгаан станцуудын аюулгүй байдалд аюул учруулахгүй хэмээн дүгнэжээ.

Д.Болд