Иракийн армийнхан “Исламын улс” хөдөлгөөнд зориулагдсан зэвсэг бүхий Их Британийн хоёр нисэх онгоцыг сөнөөсөн тухай тус улсын ФАРС мэдээллийн агентлагаас өнгөрсөн долоо хоногт мэдээлсэн. “Иракийн парламентын Үндэсний аюулгүй байдал, Батлан хамгаалах хорооны гишүүд хоёр онгоцны гэрэл зураг болон “Исламын улс”-д зориулан зэвсэг ачиж явсныг нотлох баримтуудтай танилцсан” хэмээн тус хорооны тэргүүн Ракем аль Замели мэдэгдсэн байна. Тэрбээр Иракийн парламент Их Британийн эрх баригчдаас энэ тухай тайлбар шаардсан гэдгийг өгүүлсэн аж. Түүнчлэн тусгай хорооны тэргүүн АНУ тэргүүтэй эвслийн орнуудын нисэх онгоцууд“Исламын улс” бүлэглэлийн хяналтад буй газар нутагт их хэмжээний зэвсэг агаараас буулган тус бүлэглэлийг хангадаг тухай мэдээллийг Анбар мужийн иргэд, тусгай албадын ажилтнуудаас хүлээн авдгаа мэдэгдсэн аж. Иракийн хууль тогтоогч барууны орнууд болон Саудын Араб алан хядах байгууллагуудад ийн зэвсэг нийлүүлж буй нь Анбар муж, ойролцоо орших Карбала, Багдад хотод тогтвортой байдал бий болгох сонирхолгүй байгааг илтгэж байна гэж үзжээ. Ракем аль Замели эвслийн орнуудын нисэх онгоцууд “Исламын улс”-ын дайчдыг агаараас зэвсэг, хүнсээр хангасан хэд хэдэн тохиолдол, тэднээс чөлөөлсөн суурингуудад барууны орнуудаас гаралтай орчин үеийн зэвсэг олноор илрүүлсэн тухай дурдсан байна. Үүнтэй холбоотойгоор тэрбээр “Исламын улс” бүлэглэл улам хүчирхэгжиж буйн цорын ганц шалтгаан нь барууны орнууд тэдэнтэй тэмцэх нэрээр нууцаар дэмжлэг үзүүлж буйтай холбоотой хэмээн дүгнэжээ.

Д.Болд