Тэрбумтан Ж.Сорос Европын холбоо ирээдүйд ямар төрхтэй байх нь Украин дахь үйл явдлаас хамаарч, ойрын хэдэн сарын хугацаанд шийдэгдэнэ гэж үзжээ. Тэрбээр В.Путиний Орос орон бол эзлэн түрэмгийлэгч, Украин бол Европын холбооны үндэс суурь болсон үнэт зүйлсийг хамгаалж байна” хэмээн Германы“Die Welt” сонинд өгсөн нийтлэлдээ өгүүлсэн аж. Тэрбумтан Европын холбоо Украинтай хоёр дахь Грек мэт харилцаж, алдаатай бодлого явуулж буй нь эмгэнэлтэй үр дүнд хүргэнэ гэж үзсэн байна. Ж.Сорос “В.Путин Украины зарим хэсгийг эзлэн цэрэг зэвсгийн хувьд ялалт байгуулснаар тухайн орон нутгийн төлөө хариуцлага хүлээхийг хүсэхгүй байна. Үүний оронд тэрбээр тус улсыг санхүү, улс төрийн хувьд сүйрүүлж, тогтворгүй болгож, үүнийхээ төлөө хариуцлагаас мултрахыг зорьж байна” гэжээ. Үүнээс гадна Ж.Сорос Европын орнууд Украинд Грекийн нэгэн адил багахан хэмжээний тусламж өгч, амь торгоож байгаа нь В.Путинд давуу тал олгож байна гэж дүгнэжээ. Ийм нөхцөл байдалд Украин болон тус улсын холбоотнууд шинээр үүсэх нөхцөл байдалд хариу өгөх төдийгөөс хэтрэхгүйгээс Украин улс задран унах үйл явц улам түргэснэ гэж үзсэн байна. Үүний дараа“Европын орнууд Украины хоёр сая орчим дүрвэгчид дарагдаж, улмаар Оросын эсрэг хориг арга хэмжээгээ сулруулахаас өөр аргагүй болсноор Европын холбоо улс төрийн хувьд нөлөө бүхий нэгж байхаа нэгэнт болино гэсэн таамгийг тэрбээр дэвшүүлсэн аж. Ж.Сорос Европын орнууд шинэ хүйтэн дайнаас эмээх хэрэггүй, Орос орон ЗХУ-ын нэгэн адил ялагдах нь тодорхой хэмээн зөвлөсөн аж.