Мэргэжлийн сумогийн Нагоя башёд ёкозүна Хакухо М.Даваажаргал 14 даваа, 1 унаатайгаар түрүүллээ. Тэрбээр сүүлийн өдрийн барилдаанд ёкозүна Какурюү М.Анандыг давсанаар түрүүлэх болзлоо бүрэн хангасан юм. Ийнхүү мэргэжлийн сумогийн түүхэн дээд амжилтыг Хакухо 35 түрүү болгож ахиуллаа. Тэрбээр түрүүлсэнийхээ дараагаар өгсөн ярилцлагадаа "Тэмцээний өмнө хэн нэгэн намайг харьж явна гэж ярьсан байсан. Би тийм биш гэдгээ харуулсандаа баяртай байна" гэж өгүүлсэн юм. Япончууддаа "Мэхний их дэлгүүр" хэмээн нэрлэгдсэн Майноуми башёгийн өмнө Хакухог хүч муу сул байгаа, магадгүй бүр харьж байгаа мэтээр ярьсан явдал гарсан юм. Үүнд нь Хакухо ийнхүү сүүлийн өдөр түрүүлж, түрүү бөхийн аа омгоороо хариу барилаа. 

Какурюү М.Анандын хувьд сүүлийн хоёр башёд мөрний гэмтлийн улмаас барилдаагүй хэрнээ тун сайн барилдаж, сүүлийн өдөр хүртэл Хакухотой өрсөлдөж чадлаа.

Өнөөдөр мөн Хакухо М.Даваажаргал 35 дахиа түрүүлснээс гадна 1999 оны тавдугаар сараас хойш дээд зиндаанаас огт буулгүй барилдаж чадсан, олон том дээд амжилтыг тогтоосон Кёкүтэнхо зодог тайлж буй бололтой.