Г.Болдбаатар шигшээд үлдэж, медаль хүртэх нь тодорхой боллоо
- 2015-11-26
- Спорт
- 0
Ирэх онд Бразилийн Рио де Жанейро хотод зуны Олимпийн их наадам болно. Тус наадмын жүдо бөхийн тэмцээнд оролцох тамирчдын эрхийн оноо олгох цуврал тэмцээн үргэлжилж байна. Энэ сарын 26-наас 28-ны өдрүүдэд БНСУ-ын Чежү хотод Олимпийн эрхийн оноо олгох Гранпри тэмцээн болж байгаа аж. Уг тэмцээнд 70 орны эрэгтэй, эмэгтэй 421 жүдоч өрсөлдөх юм.
Өнөөдөр эхний өдөр эрэгтэйчүүдийн 60 кг-д 2014 оны дэлхийн аварга, гавьяат тамирчин Г.Болдбаатар, ОУХМ Г.Хэрлэн, 66 кг-д ОУХМ Д.Алтансүх, 73 кг-д ОУХМ Б.Пүрэвдаваа, эмэгтэйчүүдийн 52 кг-д дэлхийн аваргын хүрэл медальт, гавьяат тамирчин М.Бумдмаа, 57 кг-д ОУХМ Л.Энхрийлэн нар барилдаж байна.
Дэлхийн аварга Г.Болдбаатар хагас шигшээд Азербайжаны О.Сафаровыг ялж, шигшээд үлдлээ. Алтан медалийн төлөө дэлхийн чансааг тэргүүлэгч, энэ оны дэлхийн аваргын хүрэл медальт БНСУ-ын Ким Вон Жинтэй барилдана. Харин ОУХМ Г.Хэрлэн эхний өрсөлдөгч Австрийн Л.Пайшерыг ялсан ч дараагийн тойрогт Францын В.Лимаред цэвэр ялагдлаа.
Зүүн Азид болдог цуврал тэмцээн өнгөрсөн долоо хоногоос эхэлсэн. Энэ сарын 20-22-ны өдрүүдэд БНХАУ-ын Чиндаогийн олимпийн эрхийн оноо олгох гранпри тэмцээнд манай жүдочид амжилттай оролцож, 2 алт, 2 мөнгө, 2 хүрэл, шагналт VII байрт 2 жүдоч орсноор багийн дүнгээр Японы дараа хоёрдугаар байрт жагссан билээ. Жүдочдын оролцох энэ оны сүүлчийн тэмцээн ирэх сарын 2-нд болох Токиогийн “Их дуулга” юм.
М.Золбаатар
Сэтгэгдэл (0)