УИХ-ын МАН-ын бүлэг чуулганы хуралдааныг өнөөдрөөс эхлэн түр завсарлуулж байгааг хууль бус хэмээн үзэж байгаагаа мэдэгдлээ.

УИХ дахь МАН-ын бүлгийн дарга С.Бямбацогт, УИХ-ын гишүүн Н.Энхболд, Ч.Улаан нар Төрийн ордонд хийсэн хэвлэлийн бага хурлын үеэр энэхүү мэдэгдлийг хийсэн юм. МАН-ын бүлгийн дарга С.Бямбацогт, "Манай бүлгээс оффшор дансны эсрэг хуулийн төслийг дэмжихээ илэрхийлсэн. Өөрөөр хэлбэл, МАН оффшор данстай хүнийг УИХ-д нэр дэвшүүлэхгүй хэмээн үзэж байгаа. Гэтэл АН сонгууль ойртсон энэ үед хуулийг хэлэлцээгүйн дээр бидэнтэй зөвшилцөлгүй чуулганыг түр завсарлууллаа" гэв.

УИХ-ын гишүүн Н.Энхболд, "Эрүүгийн тухай хуулийг ирэх 9 дүгээр сарын нэгнээс мөрдөж эхэлнэ. Чуулган хойшилсноор эдгээр хуулийн хэлэлцүүлэг мөн хойшилж байна. Үүнтэй адил хэлэлцвэл зохих чухал хуулиудыг энэ удаагийн чуулганаар хэлэлцэж амжихгүй болж байна. Мөн АТГ-ын томилгоо бүрхэг боллоо" гэсэн бол УИХ-ын гишүүн Ч.Улаан, "Хаврын чуулганаар төсөвтэй холбоотой хуулиуд хэлэлцдэг. Чуулган завсарласнаар дээрх хуулиуд хэлцэгдэхгүйн дээр ирэх оны төсвийн боловсруулалт тодорхойгүй байдал руу шилжлээ. 2017 оны төсөвт нөлөөлж болзошгүй" хэмээлээ.

О.Заяа