Ардчилсан намын ҮЗХ-ны ээлжит хурлын өмнө аймаг, дүүргийн намын хороод нь хуралдаж, нэр дэвшигчдээ тодруулж эхэллээ. Өчигдрөөс эхлэн нийслэлийн хэд хэдэн дүүрэгт нэр дэвшигчид нь урьдчилсан байдлаар тодорхой болов. Гэхдээ нэр дэвшигчдийг ҮЗХ-ны хурлаар эцэслэн батлах юм.

АН-ын дарга, УИХ-ын дарга З.Энхболд нийслэлийн Баянгол дүүрэгт нэр дэвшихээр боллоо. Түүнтэй хамтаар УИХ-ын гишүүн С.Эрдэнэ, С.Одонтуяа нар, мөн Баянгол дүүргийн Засаг дарга Д.Оросоо нар нэр дэвших мандатаа дүүргийн намын хорооноосоо авчээ.

Хан-Уул дүүрэгт УИХ-ын гишүүн Г.Батхүү нэр дэвшихээр бол тус дүүргээс хоёр ч удаа УИХ-д сонгогдсон Л.Болд, тус дүүргийн Засаг дарга Ж.Ганхуяг нар нэр дэвших дэмжлэгээ аваад байна. Мөн УИХ-ын даргын Ипотек, барилгын салбар хариуцсан зөвлөх Г.Байгалмаа ч багтжээ.  

Хэнтий аймагт УИХ-ын гишүүн, АН-ын бүлгийн дарга Б.Гарамгайбаатар, тус аймгийн Засаг дарга Ж.Оюунбаатар болон Ерөнхий сайдын зөвлөх М.Хүдэрбаатар нар нэр дэвших мандатаа өвөртөлжээ.

О.Түвшин