УИХ-ын хаврын ээлжит чуулганы түр завсарлагын хугацаа энэ сарын 23-наар дуусгавар болсон. Тэгвэл УИХ-ын даргын захирамжийн дагуу өчигдрөөс гишүүд эргэж ажилдаа орох ёстой. Гэхдээ сонгууль ид өрнөж байгаа энэ үед гишүүд хуралдаандаа ирж, ирцээ бүрдүүлэн чуулганаа хуралдуулж, энэ хаврын отгон чуулганаар амжиж хэлэлцэх ёстой хуулиудаа баталж чадах эсэх нь эргэлзээтэй боллоо. Өчигдрийн байдлаар л гэхэд гишүүд чуулгандаа ирсэнгүй. 

Уг нь хаврын чуулганы төгсгөлд олон чухал хуулийг хэлэлцэж, батлахаар төлөвлөөд байна. Тухайлбал, Батлан хамгаалах тухай хуулийн шинэчлэл, Зэвсэгт хүчний тухай хууль, Цэргийн албаны тухай хуулийн төслүүдийг эцэслэн батлах юм. Мөн Мал, амьтны эрүүл мэндийн тухай, Тахарын албан тухай хуульд нэмэлт, өөрчлөлт оруулах, Шүүхийн шийдвэр гүйцэтгэх тухай хуулийн шинэчилсэн найруулга гэх зэргээр хууль эрх зүйн шинэтгэлтэй холбоотой хуулиудыг хэлэлцэхээр төлөвлөжээ.

Эрхэм гишүүд бүрэн эрхийн хугацааныхаа сүүлийн чуулганыг нэр төртэй хаавал уг нь гоё л харагдана. Хэдийгээр сонгууль болж сурталчилгаа, тойргууддаа ажиллах гээд ажил их байгаа хэдий ч төрийн ажлыг хүндэтгэн чуулгандаа суувал том пиар болохыг ч үгүйсгэхгүй юм. Нэгэнт л ард түмэн тэдэнд дүнгээ тавихад хэдхэн хоног үлдээд байна. Ийм үед эрхэм гишүүд бүрэн эрхээ, ард түмний сонголтыг хүндэтгээд сүүлийн чуулганаа амжилтай хааж, чухал хуулиудаа батлаасай билээ. 

Эрх баригч намын дарга гаргасан захирамжиндаа хэр эзэн болох эсэхийг харах л үлдлээ. Зангарагтай зан гаргаж ирцээ бүрдүүлж асуудлуудаа шийдэх нь үү, залидаад сонгуулийнхаа пиараа хийгээд захирамжаа үл тоогоод өнгөрөх нь үү гэдэг нь удахгүй олны өмнө ил болно. 

Мөн нэг талаас эрхэм гишүүдийг үүргээ биелүүлээч гэж шаардах, нөгөө талаас ард түмнээ хүндэтгээд хуралдаандаа ирж, ирцээ бүрдүүлээсэй гэж хүсээд ирэх даваа гарагт юу болохыг л харья даа.

О.Заяа