Э.Бат-Үүл нийслэлийн Засаг даргаар ажиллаж байхдаа НИТХ-ын төлөөлөгчөөр сонгогдсон зургаан хүнийг өөрийн орлогчоор ажиллуулсан. Төлөөлөгчөөр ажиллаж, давхар орлогчийн цалин, урамшуулал авдаг энэ байдал нь хэтэрхий үрэлгэн байна хэмээн тухайн үед шүүмжлүүлэхэд хүргэсэн байдаг.

Тэгвэл ээлжит сонгуулийн үр дүнд нийслэлийн Засаг дарга бөгөөд Улаанбаатар хотын захирагчаар томилогдсон Су.Батболд өчигдөр захирамж гаргаж зургаан орлогчоо чөлөөлсөн байна.

Ингэснээр нийслэлийн Засаг даргын Санхүү, эдийн засгийн асуудал хариуцсан орлогч дарга Н.Батаа, Хот байгуулалт, хөрөнгө оруулалтын асуудал хариуцсан орлогч дарга С.Очирбат, Зам, тээвэр, дэд бүтцийн асуудал хариуцсан орлогч дарга Н.Гантөмөр, Хөдөлмөр эрхлэлт, нийгмийн хамгааллын асуудал хариуцсан орлогч дарга Ц.Буяндалай, Экологи, ногоон хөгжлийн асуудал хариуцсан орлогч дарга Т.Бат-Эрдэнэ, нийгмийн хөгжлийн асуудал хариуцсан орлогч Ц.Энхцэнгэл нарыг үүрэгт ажлаас нь чөлөөлжээ.

МАН нийслэлд цөөнхийн статустай байхдаа нийслэлийн Засаг даргыг олон орлогчтой байгаа нь төсөвт үрэлгэн хандаж буйн илрэл гэж шүүмжилж байсан юм. Тэд шүүмжилсэн шигээ байж, орлогчгүй эсвэл цөөн орлогчтой байх эсэхийг харах л үлдлээ.