Нийгэм, эдийн засгийн таагүй нөхцөлд байгуулагдсан Засгийн газар 100 дахь өдрийнхөө нүүрийг үзэх гэж буй. Өнгөрөгч хугацаанд тэд эдийн засгийг тогтворжуулах үндсэн сууриа боловсруулж, хямралаас аль болох эрсдэл багатай гарах тал дээр бодлогын баримт бичиг боловсруулан ажиллаж байгаа юм. Тодотгож хэлбэл, Монгол Улсын гадаад өр ДНБ-ний 80 гаруй хувьд хүрч, данс нь улайссан Засгийн газар хүлээж авсан учраас өдөр шөнийг үл ялган ажиллаж байгааг ард түмэн мэдэж байгаа. Тэр тусмаа нийгмийг өргөн хүрээнд хамарч ажилладаг Хүнс, хөдөө аж ахуй, хөнгөн үйлдвэрийн яам бол амрах завгүй ажиллаж байгаа юм. Мал аж ахуй, газар тариалан эрхэлдэг улс орны салбар яам ингэхээс ч өөр арга алга. 

        Өнгөрөгч дөрвөн жилд засаг тэргүүлсэн улстөрийн хүчний бодлогын алдаа өнөөдөр улс орныг туйлдуулж, ард түмнийг элгээр нь мөлхүүлэхдээ тулсныг ч нуух юун. Хамгийн наад зах нь нэгэн зуны настай цэцгэнд, нэгэн удаа хэрэглээд хаях хогны уутанд хэдэн тэрбумаар нь хөрөнгө зарж байсан нь өнөөдрийн энэ хямралд ч нэрмээс болж байна. Энэ мэт дурдаад барахгүй олон сөрөг зүйл бий. Уг нь нэг удаагийн хогны уут, нэгэн зуны настай цэцгэнд зарцуулж байсан мөнгөөр мал сүргээ вакцинжуулж, эрүүлжүүлж байсан бол өнөөдөр туйлдсан эдийн засгийг тэтгэх нэгэн үндэс суурь болох байлаа. Монгол Улс өөрөө мал аж ахуйн орон учраас ард түмэн төдийгүй улс орны эдийн засаг ч үүнээс нэн хамааралтай. Өмнөх Засгийн газарт шинжлэх ухааны үндэслэлтэй, аливаа зүйлыг олон талаас харсан бодлого байсангүй. Хамгийн наад зах нь Дэлхийн эрүүл мэндийн байгууллагаас байнга гаргаж байдаг зөвлөмжийг ч ойшоож үзээгүй нь өнөөдөр мал аж ахуйн салбарт хүндээр тусчээ. 
 

      Тиймээс мал аж ахуй, газар тариалан, хөнгөн үйлдвэрлэлийн салбар гээд нийгмийн өргөн талт ХХААХҮЯ өмнөх Засгийн газрын бодлогын алдааг засах гэж багагүй цаг хугацааг зарж байна. Нэгэнт буруу замаар будаа тээсэн бодлогын алдааг одоо л засаад цааш явахгүй бол болохгүй. “Шинэчлэлийн”, “Шийдлийн” Засгийн газрууд эдийн засгаа өсгөөд, экспортын бүтээгдэхүүний эзлэх хувийг нэмээд хаданд гаргадаггүй юм гэхэд байсан зүйлийг уруудуулж баллах хэрэггүй байсан юм. Өмнөх Засгийн газрын үйл ажиллагааны бодлого зөв байсан бол өнөөдрийн Засгийн газар зөв бодлогыг цааш нь үргэлжлүүлээд явах учиртай байв. Харамсалтай нь бүх салбараа самарчихсан Засгийн газар хүлээн авсан учраас чамгүй цаг хугацааг алдааг засахад зарцуулж байгаа юм. “Чингис”, Самурай” бондын мөнгөнөөс жижиг дунд үйлдвэрлэлийн салбарт 360 гаруй тэрбум төгрөг олгосон сураг бий. Үнэн хэрэгтээ шалгаад үзэхээр нойлын цаас үйлдвэрлэдэг компанид махны чиглэлийн зөвшөөрөл өгч, зээл олгосон байх жишээтэй. Тариалан эрхлэлтийн чиглэлд ямар ч үйл ажиллагаа явуулж үзээгүй компанид тариалан эрхлэхэд зориулж мөнгө өгсөн байхаас эхлээд олон алдаа завхралыг засч байж цааш явахаар өдөр шөнөгүй ажиллаж байгаа юм. 

       2012-2016 онд засаг барьж байсан нам, тэр тусмаа төрийн эрх барьж байгаа намын дарга, УИХ-ын дарга З.Энхболд, “Шийдлийн”, “Шинэчлэлийн” гэх хоёр Засгийн газрыг тэргүүлэн ажиллаж байсан Н.Алтанхуяг,  Ч.Сайханбилэг нар чухам ямар багаар, ямар ажил хийсэн учраас өнөөдрийн хүнд байдалд тулчихав гэдгийг хаа хаанаа тунгаасан байж таарна. Эдний бодлогын алдааг засах гэж ХХААХҮЯ өдөр шөнө, амралтын өдрийг үл харгалзан хөдөө орон нутагт ажиллаж байгааг ахин дуулгая. Тухайлбал, салбарын сайд П.Сэргэлэн тариалангийн бүс нутагт ажиллахын зэрэгцээ отрын бүс нутаг, нийслэлээс алслагдмал дүүргүүдэд ажилласаар, салбарын дэд сайд Ж.Сауле Увс, Ховд, Баян-Өлгий гээд малын гоц халдварт өвчин гарсан аймгуудад ажиллаж, бүсээ тайлах завгүй явна.  Тус яамны газрын дарга нар ч яамны бодлого, бодит байдлын талаар ард түмэнтэй санал солилцож, тэдэнд хүрч ажиллахыг хичээж байгааг ард түмэн сайшааж байна.  

Н.Дөл