Бие биенийхээ мартсаныг сануулж, санасаныг нь няцааж нэг хэсэгтээ л хэвлэл мэдээллийн бай болж, олон нийтийн анхаарлыг татаад байсан Н.Энхбаяр, Ц.Нямдорж хоёрын маргаан намжсан. Уг маргааны үеэр ихэнхи улстөрчид дуугүй байсан ч МҮАН-ын дарга, ерөнхий сайд асан М. Энхсайхан экс ерөнхийлөгчтэй эвсээд бүр хоёр намын холбоо байгуулаад авсан. Түүний  “Улстөрийн тойм” сонинд өгсөн нэгэн ярилцлагад ийм нэгэн хэсэг байх юмаа.

-Та надад өгсөн нэг ярилцлагадаа хэлж байсан. “Н.Энхбаяр надад хужаа гэдэг нэр өгсөн. Би Н.Энхбаярт авлигын загалмайлсан эцэг гэдэг нэрийг өгсөн”  гэсэн гарчигтай байсан. Гэтэл  “Хужаа”, “Авлигын загалмайлсан эцэг” хоёр нийлээд сөрөг хүчин болж, Монголыг олигархиудаас цэвэрлэх гээд байгаад олон нийт нэг л итгэхгүй байх шиг. Та хоёр нийлж юу хийж чадахаа амлаж чадах уу?

Монголын сүүлийн 20 жилийн улс төрийг Н.Энхбаяр, М.Энх-сайханаас салгаж ойлгоход хэцүү. Хоёулаа намын дарга байсан. Гэхдээ одоогийнх шиг тэврэлдсэн МАНАН биш тэрсэлдсэн МАНАН байлаа. Эрүүл өрсөлдөөн байсан. Оюун ухааны өрсөлдөөнөөсөө халиад бие биеэ эвгүй үгээр хэлэх үе ч байсан. Тэр үед л өрсөлдөгч намынхан намайг “хятад”, “хужаа” гэж хэлчих жишээтэй. Би бас нөгөө намынхаа даргыг “Авлигын загалмайлсан эцэг” гээд хэлчихсэн байдаг. Одоо эргээд бодоход “загалмайлсан” гэж хэлсэн маань буруу юм билээ.

Яагаад буруу гэж?

“Аравнайлсан” гэж хэлэх ёстой байсан юм билээ. Авлигын аравнайлсан эцэг байхгүй юу. Загалмайлсан гэдэг чинь Европ зүгээс гаралтай. Гэхдээ бид нэгнийгээ ингэж хэллээ гээд улс хохироогүй. 

Гэсэн ярилцлага өгчээ.

Ерөнхий сайд асан маань үнэхээр тэгж бодсон уу, олон хүний ой ухааныг нь сэргээж мартсаныг нь сануулна гэж хүчтэйхэн шуугиулсан экс ерөнхийлөгчөөс айсан уу, ямартай ч “авилгалын загалмайлсан эцэг” гэдэг үгээ залруулж “авилгалын аравнайлсан эцэг” болгожээ. Загалмайлах гэдэг үгийг европ зүгээс гаралтай  хэмээн үзээд монголжуулж буй нь энэ гэнэ. Угтаан бол аравнайлсан, загалмайлсан хоёр утга дүйцэх нь юу л бол...Бурханы шашинд аливаа зүйлийг ариусган дээдлэхдээ аравнайлж тахидагсан. Харин Энхсайхан дарга энэ үгийг залруулахдаа яг ямар утга илэрхийлэх гэсэн юм бол оо. Хэрэв “Авилгалыг аравнайлсан эцэг” гэх юм бол Н. Энхбаяр авилгалыг ариусгасан болж таарах нь ээ. Энэ үнэнд нийцэх үү? Харин ч үгийг мушгин гуйвуулж буй хэрэг биз.
Нээрэн ч, тэд нэгнээ тэгж хэллээ гээд улс хохироогүй. Харин ийм залруулга хийж орхивол  аравнайлсан гэдгийн ариусгах гэсэн хүндтэй утга алдагдаж, үгийн чанар хохирч магадгүй юм даа Энхсайхан дарга аа...

Э.Саран

www.UNEN.mn сайт