МОСКВА, 2024 оны гуравдугаар сарын 18 /TASS/. ОХУ-д ерөнхийлөгчийн сонгууль болж дууслаа. Сонгуулийн төв хорооны урьдчилсан мэдээллээр, саналын хуудсын 95.08 хувийг тоолж дууссаны дараах байдлаар одоогийн Ерөнхийлөгч Владимир Путин 87.32 хувийн саналаар ялж байна. 

Оросын Коммунист намаас нэр дэвшсэн Николай Харитонов 4.28 хувийн санал авч, хоёрдугаарт бичигдэж байгаа бол гуравдугаарт “Шинэ ард түмэн” намын нэр дэвшигч Владислав Даванков орж байна. Тэрбээр 3.85 хувийн санал авчээ. Харин Оросын Либерал ардчилсан намаас нэр дэвшсан Леонид Слуцкий 3.15 хувийн саналаар дөрөвдүгээрт орж байна.

Ерөнхийлөгчийн сонгуулийн санал хураалт гуравдугаар сарын 15-17-ны хооронд гурван өдрийн турш явагдлаа. Сонгуулийн ирц 74.22  хувьтай байв хэмээн Монцамэ агентлаг дамжууллаа.