Нийслэлийн Түргэн тусламжийн төвд “COVID-19”-ийн үед ашиглах "Сөрөг даралтат яаралтай тусламж"-ийн нэн шаардлагатай тоноглогдсон эмнэлгийн автомашин хүлээлгэн өглөө.

БНХАУ, ӨМӨЗО-ны засгийн ордон, Монголын Улаан загалмайн нийгэмлэг нь Нийслэлийн Түргэн тусламжийн төвд коронавирусийн цар тахалын үед ашиглах нэн шаардлагатай эмнэлгийн зориулалттай “Сөрөг даралтат түргэн тусламжийн автомашин”-ыг гардуулан өглөө.
Энэхүү автомашин нь коронавирусын цар тахалын халдварын дэгдэлтийн үед ашиглахад зориулагдсан бөгөөд энгийн түргэн тусламжийн автомашинтай харьцуулахад өөр, COVID-19-ийн халдвартай өвчтөнийг зөөж тээвэрлэх болон машины доторх орчинг бүрэн халдваргүйжүүлэх зориулалттай, амьсгалын аппарат, бусад тоног төхөөрөмжөөр бүрэн тоноглогдсон сөрөг даралтат яаралтай тусламжийн автомашин юм.

Тус автомашин гардуулах арга хэмжээнд Монгол Улсын Их Хурлын гишүүн, Засгийн газрын гишүүн, Батлан хамгаалахын сайд, МУЗН-ийн ерөнхийлөгч Н.Энхболд, Эрүүл мэндийн сайд Д.Сарангэрэл, БНХАУ-аас Монгол улсад суух бүрэн эрхт элчин сайд Шин Хаймин, Нийслэлийн Засаг даргын Хүний хөгжил, нийгмийн бодлогын асуудал хариуцсан орлогч Ш.Анхмаа, Монголын Улаан загалмайн нийгэмлэгийн ерөнхий нарийн бичгийн дарга Н.Болормаа, НТТТ-ийн захирал Ц.Пүрэвдаш болон бусад албаны хүмүүс оролцлоо.