Монгол хүний хүч чадлыг ДЭЛХИЙД ГАЙХУУЛСАН ЖҮДОЧИД

 

Бөхийн хорхойтнүүд нойр, хоолоо умартан шимтэн хорхойсч, цангаагаа тайлсан жүдо бөхийн дэлхийн аварга шалгаруулах тэмцээн хэдхэн хоногийн өмнө өндөрлөж, Монголын тамирчид зургаан медаль хүртэж бахдам амжилт гаргасан билээ. Дэлхийн аварга, гавьяат тамирчин Д.Сумъяа, дэлхийн хошой медальт М.Уранцэцэг, олимп дэлхийн хос медальт, Монгол Улсын хөдөлмөрийн баатар Н.Түвшинбаяр тэргүүтэй жүдочид өчигдөр өглөө эх орондоо ирлээ. Тэднийг Хил хамгаалах ерөнхий газар, Монголын жүдо бөхийн холбооныхон болон гэр бүлийнхэн нь халуун дотноор угтлаа. Тамирчдын сэтгэгдлийг хүргэе.

Н.ТҮВШИНБАЯР:
ЗОДОГ ТАЙЛАХ ТУХАЙ БОДОЖ БАЙНА

Монгол Улсын хөдөлмөрийн баатар, олимп, дэлхийн хос медальт Н.Түвшинбаяр “Монголын ард түмэн, жүдог дэмждэг та бүхэндээ баярлалаа. Монголын жүдочид дэлхийн аваргаас зургаан медаль хүртэж өндөр амжилт үзүүлсэн. Хамтын хүчээр энэ бахдам амжилт ирж байгаа гэдгийг онцолмоор байна. Миний хувьд энэ жил олон сайхан амжилт гаргалаа. Улсын баяр наадмаар заан цол хүртсэн. Үүнийг нутгийнхан маань мялааж наадам хийхээр болсон. Одоогоор зодог тайлах тухай бодож байна” гэсэн юм.

Д.СУМЪЯА:
ХҮСЛЭЭ БИЕЛҮҮЛЛЭЭ


Монгол Улсын гавьяат тамирчин, олимпын мөнгөн медальт, дэлхийн аварга Д.Сумъяа “Дэлхийн аварга болсондоо үнэхээр баяртай байна. Хамгийн түрүүнд нийт монголчууддаа баярлалаа. Учир нь, ард түмэн маань тамирчид бидэнтэй хамт ялж, унахад минь хамтдаа унаж байдаг шүү дээ. Финалын барилдаан нэлээд хүнд урт болсон. Сүүлд шийдэмгий мэх хийнэ гэсэн бодолтой байлаа. Түүнийгээ ч хийж чадсан. Өнгөрсөн жил олимпын наадамд түрүүлэх зорилготой очсон ч зорилгодоо хүрч чадаагүй. Алтан медаль авчихаад медалийн тавцан дээр зогсох мөчийн мэдрэмжийг авах юмсан гэж нууцхан хүсч байсан. Энэ хүслээ биелүүллээ” хэмээн сэтгэгдлээ хуваалцав.
Түүний аав К.Доржсүрэн “Охинд минь ганцхан дутуу медаль байсан нь дэлхийн аваргын алт байв. Тэрбээр 2015 оны Астанагийн дэлхийн аваргаас хүрэл, 2016 оны олимпын дэд аварга болж, дэлхийн шилдэг 16 жүдоч урилгаар оролцдог тэмцээнд гурван удаа түрүүлсэн болохоор хэзээ нэг өдөр олимп, дэлхийн аварга болно гэж боддог байлаа. Өөрөө ч дэлхийн аварга болчихоод медалийн тавцан дээр зогсох мөчийг мэдрэхийг хүсч байгаагаа ярьдаг байсан. Охиныг минь үргэлж тусалж дэмжиж байдаг “Хилчин” спорт хороо, Монголын жүдо бөхийн холбоо, Хил хамгаалах ерөнхий газрын хамт олонд энэ дашрамд баярлаж явдгаа хэлье” гэж баяраа хуваалсан юм.

О.БАЛЖИННЯМ: МОНГОЛЧУУД ТҮҮХЭН АМЖИЛТ ГАРГАЛАА

Монгол Улсын гавьяат тамирчин, жүдо бөхийн Үндэсний шигшээ багийн ахлах дасгалжуулагч О.Балжинням “Унгарын Будапешт хотод болсон дэлхийн аварга шалгаруулах тэмцээнээс манай тамирчид зургаан медаль хүртэж, түүхэн амжилт гаргалаа. Манай тамирчдаас -57 кг-ын жинд Д.Сумъяа алт, -48 кг-ын жинд М.Уранцэцэг мөнгө, +100 кг-ын жинд Н.Түвшинбаяр, -60 кг-ын жинд Г.Болдбаатар, -73 кг-ын Г.Одбаяр, -63 кг-ын жинд Б.Мөнгөнчимэг хүрэл медаль эх орондоо авчирлаа. Бид багийн дүнгээр гуравдугаар байрт шалгарсан. Өмнө нь ийм амжилт гаргаж байгаагүйг онцлох хэрэгтэй. Тамирчдын гэр бүл, дасгалжуулагчид, Монголын жүдо бөхийн холбоо, ард түмэндээ баярлаж, талархаж байгаагаа илэрхийлье. Маш олон хүний хүч хөдөлмөрөөр түүхэн амжилт гаргаж чадсан гэдгийг онцлон хэлмээр байна” гэлээ.

М.УРАНЦЭЦЭГ:БИД МОНГОЛ ХҮН ЯМАР ХҮЧТЭЙГ ДЭЛХИЙД ХАРУУЛСАН

Дэлхийн аваргын алтан медалиа мөнгөтэй хослуулсан гавьяат тамирчин М.Уранцэцэг “Дэлхийн аварга шалгаруулах тэмцээний медалиа ихэрлүүлсэндээ баяртай байна. Бидний ард маш олон хүн байдаг. Тэдэндээ баярлалаа. Манай шигшээ багийнхны бэлтгэл маш сайн байсан учир амжилтад хүрлээ. Сэтгэл зүйн бэлтгэлийг ч сайн хийсний үр дүн гарч байна. Миний хувьд финалын барилдаанд Японы Фүна Тонакитай барилдахдаа бага зэрэг алдаа гаргасан. Тэгээд л мөнгөн медаль хүртлээ. Медалийн тавцанд Казахстан улсын нэрийн өмнөөс барилдсан Г.Отгонцэцэгтэй хамт зогссон. Хоёр япон, хоёр монгол хүн зогссон нь ховор тохиох завшаан. Хоёр монгол хамт медаль хүртсэн нь бид ямар хүчтэйг дэлхийд харуулсан сайхан үйл явдал байлаа” гэж бахархав.

Г.БОЛДБААТАР: ОЛИМПЫН ДЭВЖЭЭНД ДАХИН ХҮЧ ҮЗНЭ

Дэлхийн аварга шалгаруулах тэмцээний 60 кг-ын жинд хүрэл медаль хүртсэн Монгол Улсын гавьяат тамирчин Г.Болдбаатар “Тэмцээний сугалаа нэлээд хатуу таарсан. Эхний өрсөлдөгчөөс авахуулаад барилдаан бүр хүнд боллоо. Японы залуу тамирчин Нагаяматай шөвгийн наймд шалгарахын төлөө хүч үзсэн. Хэрэв түүнд ялагдвал медалгүй хоцрох байсан болохоор эцсийн хүчээ дайчилж барилдсан. Тэгээд вазари үнэлгээгээр ялсан. Уг нь илүү амжилт гаргах зорилготой байсан ч түүндээ хүрч чадсангүй. Ямартай ч дэлхийн хос медальтан болсондоо баяртай байна. Тамирчин бүрийн хүсэл мөрөөдөл олимпод амжилт гаргах байдаг шүү дээ. Миний хувьд зодог тайлах болоогүй, Олимпын дэвжээнд дахин гарч, амжилт гаргахыг хүсч байна. Шинэ олимпын цикл эхэлсэн учир цаашдаа илүү их хичээнэ” гэж амлалаа.

Б.МӨНХ-ЭРДЭНЭ

  • Манай сайт таалагдсан бол лайк дараарай

Сонин хачин