Мэргэжлийн сүмо бөхийн дээд зиндаанд есөн удаа түрүүлсэн Ёкүзүна Харумафүжи Д.Бямбадорж нутаг нэгт сүмоч Таканойва А.Баасандоржийн толгой руу шар айрагны шилээр цохиж, гэмтэл учруулсан талаар Японы "Споничи" спортын сонинд мэдээлжээ. Улмаар Мэргэжлийн сүмогийн холбооноос Харумафүжийн кюүшюү башёд зодоглох эрхийг өчигдрөөс хязгаарласан байна. “Киодо” агентлагийн уламжилснаар, Ёкүзүна Харумафүжи албан ёсоор уучлал хүссэн аж. Таканойва А.Баасандоржийн тархи нь хөдөлж, гавлын яс нь цуурсан гэсэн оноштой эмнэлэгт хэвтэн эмчлүүлжээ. Ёкүзүна Харумафүжи “Исэгахама” дэвжээнд харьяалагддаг бол 27 настай Таканойва А.Баасандорж “Таканохана” дэвжээний нэр дээр зодоглодог юм. Эх сурвалжид бичсэнээр, тойргийн барилдааны дараа буюу өнгөрсөн сарын 26-нд Монголын бөхчүүд амарч байх үеэр Харумафүжи Таканойватай муудалцаж, гар хүрсэн байна. Сүмо бөхийн холбооны удирдах зөвлөлийн гишүүд Харумафүжигээс өчигдөр байцаалт авсан ба “Жайпан таймс” сонинд “Дээд зиндааны бөхийг зодож танхайрсан тохиолдолд сүмогийн холбооноос хатуу шийтгэл хүлээлгэдэг. Энэ асуудлаас болж Харумафүжи зодог тайлж магадгүй” хэмээн бичжээ.

Х.ЗАЯА