Өнөөдөр Улаанбаатарын цагаар 11:00 цагт Монгол Улсын Гавьяат Тамирчин, Уулын спортын олон улсын хэмжээний мастер Бадамгаравын Гангаамаа дэлхийн хоёр дахь ноён оргил болох К2 /8611 м/ уулын оргилд гарсан анхны монгол хүн болсон байна.

Дэлхийн долоон тивийн долоон оргилд хөл тавьсан анхны монгол хүн тэрбээр К2 уулын оргилоос Олон Улсын Уулчдын Холбооны Залуучуудын комиссын гишүүн О.Батсайхантай сансрын утсаар шууд холбогдон түүхэн амжилтынхаа тухай мэдээлэл хүргэжээ.

Тэрбээр хэлэхдээ ”К2 уулын оргилд Улаанбаатарын цагаар өнөөдөр өглөөний 11:00 цагт амжилттай гарлаа. Одоо би К2-ын оргил дээрээс сансрын утсаар ярьж байна. Энд маш хүчтэй шуурч байна. Удаан байж болохгуй учраас одоо яаралтай буух гэж байна. Надтай хамт Нургу Шерпа оргилд хамт гарсан” гэжээ.

К2 уулын оргилд хүрэх Монголын шилдэг уулчдын гурав дахь оролдлого ийнхүү амжилттай болсон байна.