Өсвөрийн чөлөөт бөхийн ДАШТ гурван төрлөөр Серб Улсын Сержанин хотын “Kristalna Dvorana” спортын ордонд хаалтаа хийлээ. Сүүлийн хоёр өдөр хөвгүүдийн барилдаан болж манай зургаан бөх дэвжээнд гарснаас Азийн өсвөрийн аварга З.Занабазар 54 кг-ын жинд хүрэл медаль хүртлээ. Өнгөрсөн сард манай эх оронд болсон өсвөр үеийн Азийн аварга шалгаруулах тэмцээнд алтан медаль хүртэж байсан З.Занабазар олон хүнд барилдаан хийж хүрэл медаль хүртлээ. Нэгдүгээр тойрогт Ираны бөхийг төвөггүй хожиж, хоёрдугаар тойрогт жиндээ аварга болсон, хэвтээ барилдаанд Украиний бөхөд ялагдаж, хүрэл медалийн төлөө японы бөхийг илүүрхэн хожлоо. Манай хөвгүүдээс өсвөрийн чөлөөт бөхийн ДАШТ-ээс урьд нь О.Эрдэнэцогт /1993 он/, алт, Д.Эрдэнэтулга /1998 он/, мөнгөн медаль хүртэж байсан удаатай. Ирэх жилийн өсвөрийн чөлөөт бөхийн ДАШТ-ийг долдугаар сарын 15-20-ны өдрүүдэд Словак Улсад зохиохоор болжээ. Энэ удаагийн тэмцээнд ОХУ-ын баг 85 оноогоор нэгдүгээрт жагссан бол манай улсын баг тамирчид найман оноогоор 18 дугаар байрт жагссан байна.