ОХУ-ын Холбооны зөвлөлөөс тус улсын Зэвсэгт хүчнийг Сирид ашиглахыг Ерөнхийлөгч В.Путинд зөвшөөрсөн шийдвэрийг лхагва гаригийн хуралдаанаар гаргажээ. Оросын Ерөнхийлөгчийн ажлын албаны тэргүүн Сергей Иванов энэ тухай мэдэгдэхдээ Сирид зөвхөн агаарын нисэх хүчнийг ашиглах ба Оросын цэргийн алба хаагчид хуурай замын ажиллагаанд оролцохгүй гэдгийг онцолсон аж. С.Иванов Орос улс Сирийн Ерөнхийлөгч Б.Асадын хүсэлтийн дагуу тус улсад туслахаар болсныг хэлжээ. Мөн ОХУ, ТУХН-ийн орнуудаас гаралтай иргэд “Исламын улс” бүлэглэлд нэгдэж буй нь ийм шийдвэр гаргахад нөлөөлснийг өгүүлсэн байна. “Энэ бол ОХУ-ын үндэсний эрх ашгийн тухай асуудал” хэмээн тэрбээр энэ тухай хэлжээ.