МАН-ын нэр дэвшигчийг бүртгэхээс татгалзсан асуудлаар өнөөдөр Тусгаар тогтнолын ордонд МАН-ын удирдлагууд болон Говь-Алтай, Дархан-Уул аймгийн төлөөлөл мэдээлэл хийлээ.

         Дархан-Уул аймгийн ИТХ-д МАН-аас нэр дэвшсэн зургаан нэр дэвшигчийг, Увс аймгийн ИТХ-д нэр дэвшсэн гурав, Говь-Алтай аймгийн ИТХ-д нэр дэвшсэн мөн гурван нэр дэвшигчийг холбогдох орон нутгийн сонгуулийн хороо “бүртгэхээс татгалзах үндэслэл илэрсэн” гэх шалтгаанаар хасаад байгаа аж.

МАН-ын Сонгууль хариуцсан нарийн бичгийн дарга Д.Амарбаясгалан: Нэр дэвшигчдийг хууль зөрчсөн гэж бүртгэхээс татгалзаж байна.

МАН-ын тухайд 2016 оны сонгуулийг хуулийн дагуу шударга явуулах тал дээр анхаарал тавьж, өндөр ач холбогдол өгч ажиллаж байна. Гэтэл орон нутагт ялалт байгуулах магадлал өндөр нэр дэвшигчдийг бүртгэхээс татгалзаж байна. Иймээс бид дээрх аймгуудын Сонгуулийн хороодод шаардах бичиг илгээхээр төлөвлөж байна. Жишээ хэлэхэд, Дархан-Уул аймгийн МАН-аас нэр дэвшсэн С.Насанбатыг 2012-2016 оны аймгийн ИТХ-ын төлөөлөгчөөр ажилласан хугацааны тайлангаа хэвлүүлж, сонгогчдод хүргүүлсэн гэх үндэслэлээр бүртгэхээс татгалзсан байна. С.Насанбат төлөөлөгчийнхөө хувиар дөрвөн жил ажилласан ажлын тайлангаа иргэдэд хүргүүлсэн нь Сонгуулийн тухай хуулийг зөрчсөн асуудал болохгүй юм. Манай намаас нийт 15 хүний нэрийг орон нутагт ИТХ-д нэр дэвших эрхийг зүй бусаар хаагаад байна.

Говь-Алтай аймгийн МАН-ын хорооны дарга В.Рэнцэндорж: Аймгийн Сонгуулийн хороог шүүхэд өгнө. Бид удаа дараа аймгийн сонгуулийн хороотой холбоотой асуудлыг ярьж байгаа. Говь-Алтай аймгийн Сонгуулийн хорооны 9 хүний 4 нь  төрийн албан хаагчаар жинхлээгүй, үүрэг гүйцэтгэгчээр ажиллаж байгаа юм. Тиймээс энэ асуудлаар бид СЕХ-нд хандаж байгаа. Говь-Алтай аймгийн сонгуулийн хороо хуулийн хугацаанаас хоцорч буюу энэ сарын 20-нд гаргасан шийдвэрээ зарласан. Энэхүү шийдвэрээ гаргахдаа нэр дэвшигч нарт мэдэгдэлгүйгээр улс орон даяар хэвлэлийн хурал зарлаж цацсан. Ял шийтгэлгүй тухай лавлагаа гаргаж өгсөн байтал ялтай байж болзошгүй гэж үзээд бүртгээгүй. Иймээс хууль хяналтын байгууллагад хандсан. Ял шийтгэлтэй мэтээр гүтгэсэн, сонгогдох эрхийг хязгаарласан эрхийг боогдуулсан гэх үндэслэлээр аймгийн Сонгуулийн хороог хууль хяналтын байгууллагад хандсан.

Дархан-Уул аймгийн намын хорооны дарга Б.Ариундалай: Бид аймгийн ИТХ-д нэр дэвших 33 хүний холбогдох материалыг хуулийн дагуу бүрдүүлэн өгсөн. Гэтэл манайхаас нийтдээ 7 хүнийг нэр дэвшигчээс бүртгэхээс аймгийн Сонгуулийн хороо татгалзсан. Тодруулбал, Ч.Чүлтэмбатыг ТГ-ын даргын ажилтай холбоотойгоор тавигдсан актыг, З.Бадралыг 31 хувь эзэшдэг компанийн өртэй холбоотойгоор, Б.Азжаргал, Т.Тулга нарыг ахмадуудад хүндэтгэл үзүүлсэн, С.Насанбат ажлын тайлан тавьж сэтгүүл тараасан, Д.Амарсанааг ажилладаг байгууллагынх төлөгдсөн өрөөр акт тавьж нэр дэвшигчээр бүртгэхээс татгалзсан. Сонгуулийн тухай хуулийг зөрчсөн болохыг шүүхээр тогтоосны дараа асуудлыг шийдэх ёстой. Бид сонгуулийн хороонд шалгуулах хүсэлт тавьсан ч хүлээж аваагүй гэсэн юм.

Сонгуулийн тухай хуулийн дагуу тавдугаар сарын 17-нд нэр дэвшигчээр бүртгэх эсэхийг шийдэх ёстой ч арван хоногийн дараа  бүртгэхээс татгалзсанаа хэлж, хууль зөрчөөгүй асуудлаар “ял” тулгаж байгаа нь сонгуулийг хуудуутай явуулах эхлэл гэж МАН-ын гишүүд үзэж байна.

О.Түвшин