Манай улсын хүн амын 51.4 хувийг эмэгтэйчүүд эзэлдэг билээ. Тэдний 17.4 хувийг өсвөр насны охид эзэлдэг аж. Харин нийт өсвөр насны охидын 48.9 хувь нь 10-19 насны охид эзэлж байна. Нөхөн үржихүйн насны эмэгтэйчүүдийн 69853 мянга орчим эмэгтэйчүүд төрсөн байна. Тэдний 3.8-4 хувь нь буюу 2699 нь 15-19 насны өсвөр насны охид байгаа юм. Өсвөр насны охид жирэмсэлж, улмаар хүүхэд төрүүлснээр гарах сөрөг үр дагавар их байгаа юм. Тухайлбал, өсвөр насандаа төрсөн охидын дийлэнх нь сургууль завсардаж, боловсролгүй хоцорч байна. Боловсролгүй байна гэдэг ажилд ороход хүндрэл тулгарахын дохио. Хүүхэд төрүүлсэн өсвөр насны охидын 95 хувь нь ажилгүй гэсэн судалгааны дүн байна. Нөгөө талаар, ажилд орлоо ч зөөгч, бармэн, худалдагч зэрэг үнэлэмж багатай албан бус хөдөлмөр эрхэлж байгаа юм. Үүнээс гадна өсвөр насны охид нөхөн үржихүйн эрүүл мэндийн талаар мэдлэггүйгээсээ болоод хүсээгүй жирэмслэлтэд өртөж, үр хөндүүлэх байдал нэмэгдсэн байна. Жилд 5000 орчим өсвөр насны охид жирэмсэлсний тал нь буюу 2000 орчим нь үр хөндүүлж, үлдсэн нь хүүхдээ төрүүлдэг гэсэн хамгийн сүүлийн үеийн судалгааны дүн гарчээ.