Ахыгаа ялаас чөлөөлүүлэх гэж оролдоод өөрөө эрүүгийн хэрэгт татагдаад байгаа Шастины нэрэмжит нэгдсэн 3 дугаар эмнэлгийн эмч Л. Баярцэцэг тус эмнэлэгийн даргаар томилогдсон тухай мэдээлэл цацагдаад байна. Учир нь Эрүүл мэндийн сайд Н.Удвалын өнгөрсөн сард гаргасан тушаалаар зарим эмнэлгийн дарга нарыг үүрэгт ажлаас нь чөлөөлж, шинээр сонгон шалгаруулалт явуулах хугацааг тогтоосон билээ. Өнгөрсөн баасан гаригт зарим эмнэлгийн дарга нарыг томилох шийдвэрийг  ЭМЯ-наас гаргасан аж. Тодруулбал, Клиникийн нэгдүгээр эмнэлгийн даргаар Б.Бямбадорж, Клиникийн хоёрдугаар эмнэлгийн даргаар Г.Баясгалан, Шастины нэрэмжит гуравдугаар эмнэлгийн даргаар Л.Баярцэцэг, Геронтологийн төвийн даргаар Р.Оюунханд, Эх нялхсын эрдэм шинжилгээний төвийн даргаар Ш.Энхтөр, Арьсны өвчин судлалын үндэсний төвийн даргаар А.Цогцэцэг, Нийгмийн эрүүл мэндийн хүрээлэнгийн захирлаар н.Ганчимэг нарыг томилох шийдвэр гаргаад байгаа аж. Харин дээрх эмнэлэгүүдээс бусад хэд хэдэн эмнэлгийн дарга нарын хувьд шалгаруулалтад тэнцээгүй учир сонгон шалгаруулалтыг дахин зарлахаар болсон байна. Харин үүнд нэгэн сонирхолтой даргын нэр тодорсон нь Шастины нэрэмжит гуравдугаар эмнэлгийн даргаар Л.Баярцэцэг эмчийн нэр нэгдүгээрт жагссан байна. Л.Баярцэцэг нь өвчтөний түүхийг өөрчилсөн буюу төрсөн ахаа өвчний улмаас гэсэн магадлалаар ялаас чөлөөлүүлсэн хэмээх  эрүүгийн хэрэгт татагдан шалгагдаж байгаа юм. Тодруулбал, тэрээр Баянзүрх дүүргийн цагдаагийн хоёрдугаар хэлтэст хүнд гэмт хэрэгт шалгагдаж байсан төрсөн ах  Л.Батмөнхийг ялаас мултлах зорилгоор элэгний хүнд өвчтэй гэсэн онош тавин өөрийн эмнэлэгийн элэгний тасагт хэвтүүлэн эмчлүүлж байсан юм. Ингэхдээ эмнэлгийнхээ төв сервер рүү тус эмнэлгийн эмч  А.Баярзаяа нарт үүрэг өгч нэвтрүүлэн ахынхаа өвчний оношийг өөрчлүүлсэн байдаг. Мөрдөн байцаалтын явцад эмнэлгийн их эмч А.Баярзаяа, лаборант Д.Оюунсүрэн, Ба.Сувд нараас мөрдөн байцаагчид мэдүүлэг авч, тэд хэргээ хүлээсэн билээ. Тиймээс Л.Баярцэцэгт Эрүүгийн хуулийн 245.2, 226-т зааснаар хэрэг үүсгэн шалгаж байгаа юм. Энэ талаар Эрүүл мэндийн сайд Н.Удвалаас тодруулахад "Л.Баярцэцэгийг хараахан томилоогүй байгаа. Ерөнхийдөө Шастины нэрэмжит гуравдугаар эмнэлгийн даргаар томилогдох эмч нарын жагсаалтад нэгдүгээрт жагсаж байгаа. Гэхдээ би АТГ, ЦЕГ-т албан бичиг хүргүүлсэн. Хэрвээ шалгаж байгаа нь үнэн гэсэн бичиг ирвэл томилохгүй" гэлээ.