Ерөнхийлөгч асан Н.Энхбаярын биеийн байдал муудаж байгаатай хбологдуулан Эрүүл мэндийн сайд Н.Удвал өчигдөр орой мэдээлэл хийсэн юм. Энэ үеэр сэтгүүлчид түүнээс дараах асуултанд хариулт авлаа.
-    Одоогийн хийх мэдээллийн гол учир юунд оршиж байгаа вэ?
-    Засгийн газрын гишүүд өнөөдрөөс эхлэн 10 хоног амрах гэж байгаа. Би өглөө Эрүүл мэндийн яаман дээр дуудагдаад ирлээ. Хоёрдугаар эмнэлгээс миний нэр дээр бичиг ирүүлсэн байна. Н.Энхбаяр даргын бие тасралтгүй муудаж биеийн байдал хүнд байдалд орлоо гэсэн мэдээ ирүүлсэн байна. Н.Энхбаяр даргыг 2012 онд хорьж эхлээд, энэ оны хоёрдугаар сарын 26-наас эхлэн эмнэлэгт хэвтүүлсэн. Тэр цагаас хойш надад таван удаагийн бичиг ирүүлсэн. Одоогийн байдлаар тэрээр нойргүйдэж, үүрийн дөрвөн цаг хүртэл унтахгүй байгаа гэсэн. Мөн хоолны ямар ч дуршилгүй, идсэн хоолоо шингээдэггүй. Жингээ алдаж, 93 кг-аас 66 болтлоо турсан байна. Мөн даралт нь байнга тогтворгүй, үе үе унадаг зэрэг нь амь насанд нь заналхийлэл учруулж байгаа учраас надад албан бичиг ирүүлжээ. Эмчлэгч эмч нар нь дөрөвдүгээр сарын 28-ны өдөр ялаас чөлөөлөх хүсэлт Шүүхийн шийдвэр биелүүлэх ерөнхий газрын нэгдсэн эмнэлэгт тавьсан. Үндсэндээ тэр өдрөөс хойш Эрүүл мэндийн яамны мэдлээс гараад шүүх эмнэлгийн мэдэлд очсон гэсэн үг. Энэ хугацаанд хийдэг эмчилгээгээ хийгээд байхад биеийн байдал дордоод байгаа учраас энэхүү асуудлыг анхааралдаа авах хэрэгтэй байна. Шүүхийн шийдвэр гүйцэтгэх ерөнхий газар, шүүх эмнэлэг рүү маргаашнаас би ярина.
-    Н.Энхбаярын биеийн байдал одоо Эрүүл мэндийн яаманд хамаагүй гэсэн үг үү. Ялаас чөлөөлөх хүсэлт тавьж, мэдлийг шүүх эмнэлэгт шилжүүлсэн гэлээ?
-    Эрүүл мэндийн яамнаас ялаас чөлөөлөх хүсэлт гаргаагүй. Энэ хүсэлтийг ерөөсөө Эрүүл мэндийн яамнаас гаргадаггүй шүү дээ. Шүүхийн шийдвэр биелүүлэх газрын 401-р ангийн нэгдсэн эмнэлгийн тусгай комиисс байдаг юм байна лээ. Тусгай коммист нэгдсэн эмнэлгийн зөвлөх эмч нар байдаг. Тэнд Эрүүл мэндийн яамнаас биш Хууль зүйн яамны харьяат эмч нар багтдаг. Тэд өөрсдөө дүгнэлт гаргаад,  ялаас чөлөөлөх хүсэлт гаргасан. Манай яам бол оношлох, эмчлэх үүрэг хүлээдэг.
-    Өнөөдөр ажлын цаг дуусч, орой болж байхад ингэж олон нийтэд мэдээлэл хүргэх гэсний гол зорилго юу вэ?
-    Бид удаа дараа түүний биеийн байдал муудаж байгаа талаар, ялаас чөлөөлж өгөх талаар хэлсэн, ярьсан. Юмыг яаж мэдэх вэ, янз бүрийн юм болох вий гэсэн дээ хэлж байгаа юм. Би сонгууль гэж явж явж ирлээ, Засгийн ажил ч хийлээ. Одоо амралтанд яваад 10 хононо. Энэ хооронд юу ч болоо билээ. Олон нийтэд байдал ямар байгааг нэг хүргэчихье гэж бодсон юм.
-    Н.Энхбаяр даргын Төрийн тусгай хамгаалалтыг болиулсан. Одоо жирийн иргэнтэй адил статустай болсон. Гэтэл Эрүүл мэндийн яамнаас яагаад ингэж их анхаарал хандуулж байгаа юм бэ?
-    Би МАХН-ыг төлөөлж Засгийн газарт ажиллаж байгаа, улстөрийн албан тушаалтан. Надад намаа төлөөлөх эрх бий. Манай намын даргын бие муудаж байхад би хүн чанар, ёс суртахуунаа бодоод мэдээлэл хийж байна. Би МАХН-ын хүн гэдэг утгаараа мэдээлэл хийж байна.
-    Хоёрдугаар эмнэлэгт Н.Энхбаярын биеийг эмчилж байгаа. Гэсэн хэдий ч бие нь муудсаар байна. Эмчлэх гэхээр хоёрдугаар эмнэлгийн хүчин чадал нь хүрэхгүй байгаа юм уу?
-    Эсийн задрал гэж оношлоод байгаа. Эсийн задрал бол зогсолтгүй явагддаг, зогсоож чадахгүй процесс. Үүнийг нарийвчлан оношилдог, шинжилгээнүүдийг манайх хийж чадахгүй байгаа. Халуурвал халууныг буулгах эм, даралт нь ихэсвэл даралт бууруулах эм өгч байгаагаас биш бид эмчилж чадахгүй. Энэ байдлыг бид мэдэгдээд шаардлагаа тавьсан ч анхаарал хандуулахгүй байна. Би энэхүү байдлыг мэдээлж байгаа нь хариуцлагын асуудал гэж бодож байна.
-    Эрүүл мэндийн яамны Төрийн нарийн бичгийн даргыг халаад өөрийн нутгийн хүнийг тавьсан гэх мэдээлэл гарах боллоо. Үүнд тайлбар өгнө үү?
-    Төрийн албаны тухай хуулийн хоёр заалтын дагуу Төрийн нарийн бичгийн дарга ажлаасаа халагдсан. Шинээр томилогдсон хүн бол төрийн жинхэнэ албан хаагчийн шалгалт өгч, Төрийн нарийн бичгийн шалгуурт тэнцээд, нөөцөд байсан хүн байгаа юм. Эмэгтэй хүн нямбай, урвалт шарвалтгүй, тууштай байна байх гэсэн үүднээс би тэр хүнийг сонгосон. Засгийн газрын хуралдаанаар түүнийг Төрийн нарийн бичгийн даргаар томилсон.