Нийслэлийн тойргуудын учраа хэн хэн байв
- 2016-06-02
- Улс төр
- 0

МАН болон АН-ынхан УИХ-ын сонгуульд өрсөлдөх нэр дэвшигчдээ хуулийн хугацаанд нь танилцуулсан. Эдгээрээс Нийслэлийн 28 мандатын төлөө өрсөлдөх хоёр намын нэр дэвшигчдийг танилцуулж байна.
Хан-Уул дүүрэг:
МАН-аас УИХ-ын гишүүн Д.Сарангэрэл /55 дугаар тойрог/, Ц.Нямдорж /56 дугаар тойрог/ нар Хан-Уул дүүрэгт ирсэн нь анхаарал татаж байна. Ялангуяа Ц.Нямдорж гишүүн анх удаа хотын тойрогт өрсөлдөхөөр боллоо. Тэгвэл АН-аас энэ тойрогт Хан-Уул дүүргийн Засаг дарга Ж.Ганхуяг, УИХ-ын даргын зөвлөх Г.Байгалмаа, УИХ-ын гишүүн Л.Болд /57 дугаар тойрог/, Г.Батхүү /58 дугаар тойрог/ нар нэр дэвшинэ.
Баянзүрх дүүрэг:
Нийслэлийн хамгийн олон хүн амтай Баянзүрх дүүрэгт хоёр намын томоохон лидерүүд өрсөлдөхөөр таараад байна. Тухайлбал, Ерөнхий сайд Ч.Сайханбилэг тус дүүргийн 52 дугаар тойрогт өрсөлдөж буй. Харин түүний эсрэг МАН-аас 52 дугаар тойрогт тус дүүргийн экс Засаг дарга Б.Батзориг гарах нь. Мөн энэ тойрогт МАН-аас УИХ-ын гишүүн Д.Оюунхорол нар 49 болон 50 дугаар тойргуудад хуваарилагдсан. Харин АН-аас 49 дүгээр тойрогт УИХ-ын гишүүн Д.Зоригт, 50 дугаар тойрогт УИХ-ын гишүүн, Сангийн сайд Б.Болор нар өрсөлдөх нь. Тоймловол, Баянзүрх дүүргийн тойргуудад МАН-аас Д.Оюунхорол, Ж.Энхбаяр, Б.Саранчимэг, Б.Батзориг, Д.Төмөрчулуун, П.Анужин нар хүчээ сорино. Харин АН-аас Д.Зоригт, Б.Болор, Б.Булгамаа, Ч.Сайханбилэг, Ж.Батзандан, Д.Арвин нар байгаа юм. Ерөнхийдөө АН-ынхан Баянзүрх дүүрэгт илүү хүч хаясан тал ажиглагдаж байна.
Сонгинохайрхан дүүрэг:
Нийслэлийн томоохон тойргуудын нэг болох Сонгинохайрхан дүүрэг зургаан мандаттай. Энд МАН-аас Ц.Гарамжав, Н.Учрал, Д.Сумъяабазар, Д.Тэрбишдагва, Д.Ундармаа, Х.Нямбаатар нар сонгогчид дээрээ очиж байна. Харин АН-аас тус дүүргийн АН-ын дарга Д.Пүрэвбаатар, Л.Эрдэнэчимэг, М.Чинболд, Б.Ургамалцэцэг, Ш.Түвдэндорж, О.Магнай нар өрсөлдөж байгаа юм. Ерөнхийдөө хэн нь хэнийгээ ч ялж мэдэхээр “барьцгүй” тойрог Сонгинохайрхан болоод байна.
Сүхбаатар дүүрэг:
“Үхлийн” гэж хэлж болохоор хүчтэй өрсөлдөгч нар Сүхбаатар дүүрэгт таараад байна. Ер нь ч урьд өмнөх сонгуулиудаар ч бас Сүхбаатар дүүрэгт хоёр намын шилдгүүд л хүч үздэг байсан. Энэ удаад АН-аас тус дүүрэгт Б.Мэдрээ /59 дүгээр тойрог/, Х.Тэмүүжин /60 дугаар тойрог/, М.Батчимэг /61 дүгээр тойрог/, Л.Гантөмөр /62 дугаар тойрог/ нар өрсөлдөнө. Харин МАН-аас Д.Цогтбаатар, Ц.Мөнх-Оргил, Сү.Батболд, Ц.Цогзолмаа нар байгаа юм. Жишээ нь МАН-ын шилдэг, залуу улстөрчдийн нэг болох Д.Цогтбаатар 59 дүгээр тойрогт АН-ын Б.Мэдрээтэй таарах нь. Түүнчлэн Хууль зүйн сайд асан Х.Тэмүүжин МАН-ын бас нэгэн шилдэг хуульчдын нэг болох Ц.Мөнх-Оргилтой “нэгийгээ үзэхээр” болоод байна. МАН-ын дарга,Ерөнхий сайд асан Сү.Батболдын эсрэг АН-ын эмэгтэй улстөрч М.Батчимэг нэг мандатын төлөө өрсөлдөхөөр болсон нь мөн л анхаарлын төвд байгаа юм.
Чингэлтэй, Налайх дүүрэг:
ИЗНН-аас АН-д элссэн С.Дэмбэрэл, УИХ-ын гишүүн Г.Баярсайхан УИХ-ын гишүүн асан Н.Мөнхзаяа, Уул уурхайн дэд сайд асан О.Эрдэнэбулган нар Чингэлтэйн тойргуудад намаа төлөөлөх нь. Харин МАН-аас энэ тойргуудад Т.Аюурсайхан, М.Оюунчимэг, Ө.Энхтүвшин, Н.Ганболд нарыг илгээлээ.
Баянгол дүүрэг:
Баянгол дүүрэгт МАН-аас Д.Лүндээжанцан 70 дугаар тойрогт ирлээ. Түүнтэй хамтаар Н.Ундраа, Ж.Ганбаатар нарын залуу улстөрчид, Баянгол дүүргийн Засаг дарга асан Д.Амгалан нар 67-69 дүгээр тойрогт ирсэн. Тэгвэл АН-аас энэ тойрогт УИХ-ын гишүүн С.Одонтуяа, С.Эрдэнэ нараас гадна УИХ-ын дарга З.Энхболд, дүүргийн засаг дарга асан Д.Оросоо нар Баянголын тойргуудад өрсөлдөнө.
О.Заяа

Сэтгэгдэл (4)
(202.55.180.200)
сэтгэл судлалын багш мэргэжилээр төгссөн юм чинь иргэдээ ойлгох нь аргагүй юм байна.
(64.62.219.154)
Элсэлтийн ерөнхий шалгалтыг цахимжуулсан нь арын хаалга байхгүй шудрага болсон
(103.212.116.182)
Amjilt hvsie ta chadnaa
(103.229.123.170)
Энэ сонгуульд ЗААВАЛ ялалт чинийх байх естой шүү. Эмэгтэйчүүдын бүх саналыг авах хэрэгтэй.