БНСУ-ын Чеонг Янг хотноо болсон таеквондогийн Азийн оюутны аварга шалгаруулах тэмцээнээс манай тамирчид ганзага дүүрэн ирлээ. Тэмцээний 68 кг-ын жинд тулалдсан М.Мягмарбаяр Лаос, Казахстаны тамирчныг онооны давуугаар ялж алтан медаль хүртсэн байна. Мөн 58 кг-д өрсөлдсөн М.Түмэнбаяр, 74 кг-д тулалдсан Э.Мөнхбуян нар жиндээ аваргалж алтан медаль зүүжээ. Мөн Н.Энхдөл, Б.Түвшинжаргал, С.Янжинлхам нар мөнгөн медалийн эзэн болсон байна. Харин Д.Энхтүвшин, П.Тэмүүжин, Л.Мөнхгэрэл нар хүрэл медаль хүртжээ. Таеквондогийн Азийн Оюутны аварга шалгаруулах IV тэмцээн өнгөрсөн сарын 30-аас энэ сарын 4-нд болсон юм. Манай тамирчид энэ удаагийн тэмцээнд анх удаа багийн төрөлд оролцож хоёрдугаар байрт шалгарсан амжилтаар эх орондоо ирлээ.