Японы Хофу хотноо жил бүр уламжлал болгон зохиодог Хофу Ёмиюри марафон гүйлтийн тэмцээнд Монгол Улсын гавьяат тамирчин Бат-Очирын Сэр-Од түрүүлжээ. Арванхоёрдугаар сарын 15 буюу өчигдөр болсон 44 дэх удаагийн энэхүү олон улсын тэмцээнд 4030 тамирчин 42,2 км-ийн зайд өрсөлдсөн байна. Гавьяат тамирчин Б.Сэр-Од хоёр цаг есөн минутийн (2:09:00) амжилтаар тэргүүн байр эзэлсэн байна. Тэрээр 2010 онд 2:14:49, 2011 онд 2:11:56 цагийн амжилтаар Хофу хотноо болдог марафон гүйлтийн тэмцээнд түрүүлсэн юм. Энэ удаагийн тэмцээнээр хоёр минут таван секундээр (02:05 минут) амжилтаа ахиулсан байна.