Өчигдөр буюу 01-р сарын 13-ны даваа гарагт ОБЕГ-ын харьяа “Аврагч” спорт хорооны зааланд “ИХ БОГД ДЭВЖЭЭ”-ний нэгдүгээр сарын ээлжит барилдаан амжилттай зохион байгуулагдаж өндөрлөлөө. Энэ удаагийн барилдааныг Х.Бат-Эрдэнэ даргатай Баянцагаан сумын нутгийн зөвлөл ивээн тэтгэж явууллаа. Барилдаанд улсын начин Ж.Чулуунбат, а.а Р.Дамдин, Д.Энхбат, Б.Эрдэнэхүү, Б.Бат-Орших, Д.Батбаяр нарын тэргүүтэй хүчит 64 бөх зодоглосноос шөвгийн 4-т у.н Ж.Чулуунбат, а.а Д.Энхбат, Б.Бат-Орших, Б.Эрдэнэхүү нар шалгаран үлдэж шөвгийн дөрвөн бөхийг тойргын журмаар барилдуулан түрүү бөхөө тодрууллаа. Аймгийн арслан Б.Эрдэнэхүү өрсөлдөгч 3 бөхөө өвдөг шороодуулан унаагүй түрүүлж, Аймгийн арслан Б.Бат-Орших үзүүрлэлээ. Улсын начин Ж.Чулуунбат, Аймгийн арслан Д.Энхбат нар их шөвөгт үлдлээ.

Барилдааны үеэр 3 үзэгч азтанаар шалгарч мөнгөн шагналаар шагнагдлаа. Мөн уран барилдааны шагналыг Баянцагаан сумын лам Доржоо Хүрээмарал сумын харьяат сумын заан Г.Жамбалдоржид гардуулав. Шилжин явах цомыг дараа сарын барилдаан зохион байгуулах Баацагаан сумын Нутгийн зөвлөл, а.а Р.Дамдинд гардуулж өглөө.

Ая зохиогч, дуучин Н.Баасандорж “Хонгор нутгийн манлай бөх” дуугаар, залуу дуучин Д.Нямжав Хонгор нутгийн аялгуу, Аархал дуугаараа ая дууны мэнд өргөлөө.
Энэхүү барилдааныг ивээн тэтгэж, хамтран зохион байгуулсан Х.Бат-Эрдэнэ даргатай Баянцагаан сумын Нутгийн зөвлөлийн хамт олон болон барилдаанд оролцсон дуучид, бөхчүүд, засуул, цэц, тайлбарлагч, гарын даа, үзэгчиддээ талархал илэрхийлье.

Баянхонгор нутгаас улсын алдар цолтой бөхчүүд олноор төрөн гарах болтугай.