Монголын шигшээ багийн цаначин Болдын Бямбадорж өнөөдөр Улаанбаатарын цагаар 18:00–аас эрэгтэйчүүдийн цанын 15 км-ийн сонгодог тэшилтийн төрөлд уралдаанынхаа замд гарна. Энэ удаагийн төрөлд 52 улсын 112 тамирчин хурд хүчээ сорих юм. Олимпийн нээлтийн үеэр Монголын багийн тугчаар ажилласан Б.Бямбадорж нь 1991 онд Булган аймагт төрсөн бөгөөд 2007 оноос хойш цанын спортоор хичээллэж байгаа юм. 2012 оны долдугаар сараас эхэлсэн олимпийн эрхийн оноо олгох тэмцээнүүдэд тогтмол оролцсон тэрээр Б ангилалд өөрийн үзүүлсэн цагаараа шалгарч эрхээ авсныг энд онцлох хэрэгтэй. Энэ жил Монгол Улс олимпийн наадамд оролцсоны 50 жилийн ой тохиож байгаа юм. 1964 оны Инсбрукийн олимпод цана, тэшүүр, биатлоны 14 тамирчин оролцсоноор Монгол Улс олимпизмын хөдөлгөөнд данстай болж байсан билээ.