Швед улсад болсон пауэрлифтингийн хэвтээ шахалтын дэлхийн аварга шалгаруулах тэмцээнээс хошой хүрэл медаль хүртсэн О.Орхонтуултай цөөн хором ярилцлаа.

-Дэлхийн аварга шалгаруулах тэмцээнээс хошой хүрэл медаль хүртсэнд баяр хүргэе. Өрсөлдөгчид хүчтэй байв уу?

-Өрсөлдөгчид их хүчтэй байлаа. Би тэмцээний 85 кг-ын жинд оролцож, хүрэл медаль хүртсэн.

-Медалийн өнгөө хувиргах боломж хэр байсан бол?

-Дэлхийн аварга шалгаруулах тэмцээнд илүү амжилттай оролцох боломж байсан ч техникийн алдаа гаргаад бүтэлгүйтсэн. Түүнээс биш медалийн өнгөө хувиргах бүрэн боломжтой байсан.

-Одоо ямар тэмцээнд оролцохоор төлөвлөж байна вэ?

-Чех улсад ирэх наймдугаар сарын 30-наас есдүгээр сарын 6-ныг хүртэл үргэлжлэх пауэрлифтингийн өсвөр залуучуудын дэлхийн аварга шалгаруулах тэмцээнд оролцохоор төлөвлөж байна.

-Спортын олон төрлөөс чухам яагаад пауэрлифтингийг сонгон хичээллэсэн юм бэ?

-Спортын төрөл бүр өөрийн гэсэн онцлогтой. Пауэрлифтинг бол тэсвэр хатуужлын спорт. Би өмнө нь тэвчээргүй, шантрамтгай хүүхэд байсан. Тэгээд л тэвчээр хатуужилтай болохын тулд энэ спортоор хичээллэсэн юм.

С.ЦЭРЭНДЭЖИД