Аймаг сумдын дарга нарт энэ сардаа багтаан баяр наадмаа тэмдэглэх үүрэг өгсөн билээ. Үүний дагуу зарим аймаг, сум баяраа тэмдэглэж эхлээд байна. Баяр наадмуудад улс аймгийн алдар цолтой хүчтэнүүд барилдаж байгаа юм. Булган аймгийн Сайхан сумынхан “Дөрвөн түмэн адууны баяр”-аа хийсэн байна. Наадмын үеэр улс аймгийн 128 бөх барилдсанаас олимпын аварга, улсын харцага Н.Түвшинбаяр түрүүлж, улсын начин Р.Пүрэвдагва үзүүрлэжээ. Олимпын аварга энэ жилийн улсын наадамд шинээр улсын начин цол хүртсэн А.Алтанхуягт өвдөг шороодсон. Мөн энэ онд Увс аймгийн 90 жилийн ой тохиож буй юм. Увсчууд ойн баяраараа “Монгол бөхийн их баяр”, баруун бүсийн хурдан морины “Увс хурд-2015” уралдааныг зохион байгуулахаар болжээ. Тэд 90 жилийн ойгоо “Монгол бөхийн их баяр” хэмээсэн нь учиртай аж. Учир нь тус наадамд дархан аварга А.Сүхбат барилдах бөгөөд улсын аварга О.Балжинням, С.Мөнхбат, улсын арслан Б.Ганбат, П.Бүрэнтөгс, Н.Батсуурь зэрэг улс, аймгийн алдар цолтой 512 бөх зодоглох аж. Наадмын найруулагчаар Төрийн соёрхолт бүжиг дэглээч С.Сүхбаатар ажиллажээ.