Монгол Улсын Ерөнхий сайд Ч.Сайханбилэг БНСУ-ын Гванжу хотноо болсон Оюутны спортын XXVIII Универсиадад амжилттай оролцсон баг тамирчид, дасгалжуулагчдад хүндэтгэл үзүүлж, спортын өндөр амжилт хүслээ. Энэ үеэр Ерөнхий сайд Ч.Сайханбилэг “Алдартнуудаа төрийн дээд одон медалиар шагнахаас гадна санхүүгийн хувьд дэмжлэг үзүүлдэг шийдвэрийг 1998 онд санаачилсан. Энэ бодлогоо Засгийн газар цаашид ч үргэлжлүүлнэ. Дэлхийн том универсиадад баг хамт олноороо амжилттай оролцож, Монгол Улсын төрийн далбаагаа мандуулж, төрийн дууллаа эгшиглүүлсэн тамирчид, дасгалжуулагч нартаа амжилт хүсье” гэв. Дэлхийн оюутны спортын наадмын жүдо бөхийн төрөлд алтан медаль хүртсэн Д.Сумъяад Засгийн газрын 2014 оны тогтоолын дагуу 30 сая төгрөг, буудлагын төрөлд алт, мөнгө, хүрэл медаль хүртсэн Э.Даваахүүд 36 сая, жүдо бөхийн төрөлд хүрэл медаль хүртсэн М.Уранцэцэгт 10 сая, буудлагын төрөлд мөнгө, хүрэл медаль хүртсэн О.Төгөлдөр, Э.Бадамгарав нарт тус бүр зургаан сая төгрөгийн мөнгөн шагнал олгох батламжийг гардуулсан юм.