Хүний хөгжил сангаас Монгол Улсын 0-18 хүртэлх насны хүүхдэд сар бүр 20 мянган төгрөг олгодог байсан бөгөөд өнгөрсөн долдугаар сараас эхлэн олгогдоогүй билээ. Өрхийн амьжиргааны түвшин тогтоох судалгаанд үндэслэж 0-10-р бүлэгт хамаарсан өрхийн хүүхдүүдэд сар бүр 20 мянган төгрөгийг хэвийн олгохоор болсон бол 10-20-р бүлэгт хамаарах өрхийн хүүхдийн мөнгийг 2019 онд нөхөж олгохоор шийдвэрлээд байгаа юм. Улсын хэмжээнд нэг сая 21 мянган хүүхэд сар бүр 20 мянган төгрөг авдаг байна. Тэгвэл эхний ээлжид нийт хүүхдийн 60 хувьд нь мөнгийг нь бэлнээр олгохоор болсон. УИХ-ын ээлжит бус чуулганаар төсвийн тодотголыг хэлэлцэж, баталсан. Үүний дараа есдүгээр сард багтаан хүүхдийн мөнгийг олгож дуусна хэмээн мэдээлж байсан ч одоогоор нэг ч хүүхэд мөнгөө аваагүй байгаа. Энэ талаар Сангийн яамны Санхүүгийн бодлогын газрын мэргэжилтнээс тодруулахад нийт хүүхдийн 60 хувьд олгох хэмжээний хөрөнгийг өчигдөр шилжүүлсэн. Хуваарилалтыг Монголбанк болон Халамжийн газар хариуцаж байгаа гэлээ.

Олон айл өрхийн амжиргааг залгуулдаг хүүхдийн мөнгөний хүлээлт удахгүй дуусах бололтой.

Б.Цэцэн