Ерөнхий сайд Ж.Эрдэнэбат Япон улсад албан ёсны айлчлал хийнэ. Тэрбээр энэ сарын 12-15-ны өдрүүдэд тус улсад айлчлах бөгөөд Япон улсын Ерөнхий сайд Шинзо Абэ-тай албан ёсны хэлэлцээ хийх юм байна. Энэ үеэр “гуравдагч хөрш” Япон улстай хөгжүүлж буй харилцаанд Монгол Улс тэргүүлэх ач холбогдол өгч буйг нотлон, ирэх жилүүдэд баримтлах Монгол, Японы стратегийн түншлэлийн агуулга, чиглэлүүдийг тохирох аж. Ерөнхий сайд Ж.Эрдэнэбат Японы Парламентын зөвлөхүүдийн танхимын дарга Ч.Датэ, Төлөөлөгчдийн танхимын дарга Т.Оошима нарт бараалхана. Мөн “Монгол, Японы худалдаа, хөрөнгө оруулалтын форум”-д оролцож, Монголын эдийн засгийн байдал, хөрөнгө оруулалтын орчин, хамтын ажиллагааны боломжуудын талаар Японы хувийн хэвшил, хөрөнгө оруулагчдад танилцуулж, санал солилцох юм байна.

М.Өнөрөө